Warar dheeraad ah ayaa laga helayaa rag hubeysan oo habeenimadii xalay aheyd, magaalada Boosaaso ee Xarunta Gobolka Bari ka geystay Weerar loo adeegsaday Bambooyin iyo dil qorsheysan oo loo geystay Nin kamid ahaa Ganacsatada magaalada.
Dabley hubeysan ayaa toogasho ku dilay nin ka mid ahaa ganacsatada yar yar ee wax kuu iibiya suuqa wayn ee magaalada, kadib markii ay raasaas ku fureen, isla markaana waxaa ganacsadaha uu u geeriyooday rasaas ka haleeshay qeybaha sare ee jirkiisa.
Dhinaca kalena, waxaa xalay bambooyin lagu tuuray guriga wasiirka amniga Puntland Ibraahin Cartan Xaaji Bakiin, saraakiisha amniga ayaa sheegay inaanay jirin cid wax ku noqotay bambooyinkan la tuuray.
Sidoo kale saraakiisha ammaanka maamulka Puntland ee Boosaaso oo la hadlay VOA-da ayaa u sheegay inay wadaan howlgalo lagu raadinayo dableydii ka danbeeysay dilka loo geystay Ganacsadaha iyo Weerarka Bambaano ee lagu qaaday guriga Wasiirka amniga.
Bilihii u dambeeyey waxaa magaalada Boosaaso ee Xarunta Gobolka Bari ka dhacay qaraxyo, kuwaas oo intooda badani ay dhacaan xilliga habeenkii ah, iyada oo lala beegsanayo goobaha ganacsiga, mana jirto illaa haatan cid si toosa u sheegatay weeraradan.
