Caasimadda dalka Gaambiya ee Banjul ayaa waxaa ka furmi Shir Sanadeedka Ururka Islaamka ee OIC, kaasi oo socon doona muddo Labo maalmood (May 4da ilaa 5da).
Wafuud ka kala socda 57-ka Waddan ee ku bahoobay Ururkaasi ayaana xaadir ku ah Madasha Shirka.
Ajendayaasha ay Hoggaamiyayaasha Dowladaha xubnaha ka ah Ururkaasi ka wada xaajoon doonaan waxaa ugu muhiimsan Arrimaha Siyaasadda ee Dunida Islaamka, Qaddiyada Reer Falastiin, Dagaalka Sudan, Islaam Nacaybka, Dhaqalaha, Samafalka, Mujtamaca, Dhaqanka, Isbedelka Cimilada, Sayniska iyo Teknoolajiyada, Warbaahinta, Arrimaha Muslimiinta laga Tirada badan yahay ee ku nool dalalka aan xubnaha ka ahayn Ururka OIC Arrimaha Dhallinyarada, Haweenka, Qoyska iyo qoddobo kale.
Hal-ku-dhega Shirka 15-aad ee Ururka Islaamka ee OIC waxa uu sanadkan yahay: Xoojinta Midnimada iyo Wadajirka loo marayo Wada-xaajoodyo si loo gaaro Horumar Waara”.
Gebagebada Shirkaasi waxaa la filayaa in laga soo saaro Bayaan Loo dhan yahay oo loogu magac daray: Bayaanka Banjul .
Kulanka waxaa kaloo laga soo saarayaa Qaraar ku aadan Qaddiyada Reer Falastiin iyo Masjidka Al-Qudus Shariif.
