Jurgen Klopp ayaa 19ka bishan May soo afjari doona muddo sagaal sannadood ah oo uu tababare u ahaa Liveprool, waxaana uu xilli-ciyaareedkiisu kusoo xidhmi doonaa iyadoo kooxdiisu kaliya ku guuleysatay Carabao Cup oo bishii February ay ka qaadeen Chelsea oo ay rikoodheyaal ku garaaceen, taas oo ka dhigan in xilli-ciyaareedkiisa macasalaamayntu aanu u noqonin sidii uu doonayey.
Shantii ciyaarood ee ugu dambeeyey ee horyaalka Premier League ayaa Liverpool ka saartay tartanka horyaalka Premier League oo hadda Manchester City ama Arsenal ay ku guuleysan doonto.
Waxa kale oo kooxda Jurgen Klopp tartanka FA Cup ka saartay manchester United, halka kooxda Atalanta ay sidoo kale ka cidhib-tirtay tartanka Europa League iyadoo ku karbaashtay garoonka Anfield.
Sidaas oo ay tahay, Jurgen Klopp waxa uu uga tegi doonaa Liverpool siddeed koob oo uu u qaaday muddadii uu joogay oo kasoo bilaabantay sannadkii 2015, kuwaas oo ay ku jiraan Premier League iyo Champions League oo ah labada koob ee ugu qiimaha badan.
Warbixinteennan, waxa aynu ku eegaynaa oo aynu isbarbar-dhig ku samaynaynaa lacagtii uu Jurgen Klopp kharash gareeyey sagaalkii sannadood ee uu joogay Anfield iyo lacagihii ay suuqa ku farrasheen kooxaha waaweyn ee Premier League ee Manchester City, Manchester United, Arsenal, Chelsea iyo Tottenham.
Waxa kale oo aynu xusi doonaa saxeexyadii waaweynaa ee ay sameeyeen kooxahan, iyadoo sidoo kale aynu soo bandhigayno lacagta naqadka ah ee ay koox walba kharash garaysay, iyadoo laga jaray lacagtii ay ka heleen ciyaartoydii ay iyagu iska iibiyeen.
