Guddoomiyaha Gobolka Banaadir Ahna Duqa Magaalada Muqdisho Mudane Yuusuf Xuseen Jimcaale (Madaale) ayaa ka qeyb galay kulan balaaran oo uu Maamulka Gobolka Banaadir iyo howl wadeenada Maamulka Gobolka Banaadir iyo Dowladda Hoose ee Xamar ku taageerayeen uguna mahadcelinayeen Madaxweynaha Jamhuuriyda Federaalka Soomaaliya Mudane Xasan Sheikh Maxamud in Soomaaliya ay xubin ka noqotay Golaha Amaanka Qaramada Midoowe, taas oo ah guul weyn oo usoo hooyatay Jamhuuriyada Federaalka Soomaaliya.
Kulankan waxaa goob joog ka ahaa Guddoomiye Ku-xigeenka Amniga iyo Siyaasada Maamulka Gobolka Banaadir Maxamed Axmed Diiriye (Yabooh), Guddoomiyaasha Degmooyinka, Aggaasimayaal, iyo kumanaan kamid howl wadeenada Maamulka Gobolka Banaadir iyo Dowladda Hoose ee Xamar
Guddoomiyaha Gobolka Banaadir Ahna Duqa Magaalada Muqdisho Mudane Yuusuf Xuseen Jimcaale (Madaale) oo kulankan ka hadlay ayaa uga mahadceliyay Madaxda Qaranka guulaha isdaba jooga ah ee ka gaareen siyaasada arrimaha Dibadda iyo Gudaha, kuwaas oo horseed u ah in Soomaaliya ay markale cagaheeda si buuxda ugu istaagto.
