Waxaa xalay lagu dilay magaalada Cape Town ee dalka Koonfur Afrika muwaadin Soomaaliyeed oo lagu magacaabi jiray Cabdiraxmaan Mowliid, kadib markii koox burcad hubeysan ah ay rasaas ku fureen isagoo ku sugan goobtiisa ganacsigaFalka dilka ah ayaa ka dhacay dukaan ku yaalla Xaafadda Samora, halkaas oo Cabdiraxmaan uu ka shaqeynayay. Sida ay xaqiijiyeen goobjoogayaal iyo guddoomiyaha jaaliyadda Save Somali Community Cabdi Calas Guure, burcadda ayaa rasaas ku furay marxuumka iyaga oo aan wax dhac ah ka geysan dukaanka, kadibna goobta ka baxsaday kahor inta aysan booliisku imaan.Geerida Cabdiraxmaan ayaa ku soo beegmaysa iyadoo habeen hore ay koox kale oo burcad ah ku dileen labo muwaadin Soomaaliyeed gudaha Kraaifontein, taasoo cabsi xooggan gelisay ganacsatada Soomaaliyeed ee ku nool Cape Town.Falalkan isdaba joogga ah ee lagu bartilmaameedsanayo Soomaalida ganacsiyada ku leh magaalada Cape Town ayaa kordhaya, iyadoo aan weli wax tallaabo ah oo wax ku ool ah laga qaadin dambiilayaasha.
