Ciidamada milateriga Hindiya iyo Pakistan ayaa isku waydaarsaday rasaas xadka kala qaybiya labada dal ee loo yaqaan Line of Control (LOC), Qaramada Midoobay ayaa ku baaqay in la muujiyo “xakameyn buuxda” xilli digniino laga bixiyay suuragalnimada dagaal ka dhasha weerarkii ugu dambeeyay ee dhimashada sababay kaas oo ka dhacay magaalada Pahalgam ee gobalka Kashmir.Gobolka Kashmir waxa uu u qaybsanyahay laba qaybood tan iyo markii ay wadamadani madax-bannaanida heleen sanadkii 1947, labada dal ayaa midwaliba waxa uu sheegtaa lahaanshiyaha dhammaan dhulka gobolka Kashmiir, balse mid walba waxa uu maamulaa qeyb gaar ah. Tan ayaa keentay xiisado sii jiitama oo marar badan isku beddelay rabshado iyo dagaallo dhexmaray India iyo Pakistan.Ilo ka tirsan milatariga Hindiya ayaa u sheegay warbaahinta Al Jazeera Jimcihii in dhinaca Pakistan uu bilaabay rasaasta. Dhanka kale Mas’uul dowladeed oo ka tirsan Kashmirta ay maamusho Pakistan, ayaa sidoo kale u xaqiijiyay wakaaladda wararka ee AFP in ciidamada is-weydaarsadeen rasaas, balse ma sheegin ciddii bilowday weerarka.Maalinimaddii Talaadada, maleeshiyaad fallaago ah ayaa ugu yaraan 26 qof waxa ay ku dileen gudaha goob dalxiis oo ku taalla magaaladda Pahalgam, kaas oo noqotay weerarkii ugu dhimashada badnaa oo muddo rubuc qarni ah ka dhaca gudaha Kashmirta ay maamusho Hindiya.Weerarkaasi dhimashada badan sababay ayaa waxa uu dhaliyay muran diblomaasiyadeed oo u dhexeeya New Delhi iyo Islamabad. Hindiya waxay ku dhawaaqday inay ka baxday heshiiska biyaha webiyada Indus, halka Pakistan ay hakisay mashruuc waraabin ah iyada oo sidoo kale ka xirtay hawadeeda diyaaradaha Hindiya.
