Waxaa maanta si rasmi ah loo daah-furay Mashruuca Taakuleynta iyo Afurinta dadka danyarta ah inta lagu guda jiro bisha barakeysan ee Ramadaan.
Mashruucan oo ay fulineyso Hay’adda Hormuud Salaam Foundation, ayaa laga billaabay Xarunta Daaweynta Xanuunnada Dhimirka ee Dr. Xabeeb oo ku taal degmada Dharkenley ee gobolka Banaadir.
Dr. Cabdiraxmaan Cali Cawaale (Xabeeb) oo ah maamulaha xaruntan lagu daryeelo dadka qaba xanuunnada dhimirka ayaa la wareegay Deeqdan oo isugu jirta raashinka quutul-daruuriga ah sida; Bur, Bariis, Sonkor iyo Saliid.
Guddoomiyaha Hay’adda Hormuud Salaam Foundation, Cabdullaahi Nuur Cusmaan, oo goobta ka hadlay ayaa tilmaamay in xarunta Dr. Xabeeb ay ku sugan yihiin dad wajahaya duruufo adag oo u baahan caawimaad joogto ah.
“Maadaama dadka halkaan ku sugan ay sannadba sannadka ka dambeeya sii kordhayaan, waxaan mar kasta diyaar u nahay inaan kaalmayno, Mashruuca Afurinta iyo Taakuleynta dadka danyarta ahna waan sii wadi doonnaa inta lagu jiro bisha barakeysan,” ayuu yiri Guddoomiye Cabdullaahi Nuur.
