Baydhabo, 17 Agoosto 2026: Dowladda Koonfur Galbeed Soomaaliya ayaa soo saartay war-saxaafadeed ku saabsan weerarkii maanta ka dhacay magaalada Baydhabo, kaas oo ay sheegtay in ay iska kaashadeen Ciidanka Dowladda Federaalka Soomaaliya iyo Ciidanka Birmadka Dowladda Koonfur Galbeed.
Dowladdu waxay sheegtay in ciidamadu si geesinimo leh uga hortageen weerar ay magaalada Baydhabo ku soo qaadeen Al-Shabaab iyo maleeshiyooyin la midoobay.
Sida lagu sheegay war-saxaafadeedka, dagaalka oo bilowday aroortii ayaa socday ku dhowaad laba saacadood.
Dowladda Koonfur Galbeed waxay sheegtay in ciidamada ay dileen in ka badan 50 xubnood, isla markaana gacanta lagu dhigay maxaabiis badan.
Waxa kale oo ay sheegtay in ciidamadu ay ka soo furteen dhinacyadii weerarka soo qaaday gaadiid dagaal iyo hub tiro badan.
Dowladdu waxay ammaan iyo bogaadin u jeedisay ciidamada dowladda iyo shacabka Koonfur Galbeed ee door ka qaatay iska caabbinta weerarka, iyadoo sidoo kale tacsi iyo duco u dirtay dadkii ku dhintay dagaalka, Alle-na uga baryay inuu u naxariisto.
War-saxaafadeedka ayaa sidoo kale shacabka Koonfur Galbeed loogu baaqay inay muujiyaan degganaansho iyo feejignaan, isla markaana ay ka fogaadaan goobaha xasaasiga ah ee amniga iyo meelaha ay ka dhici karaan falal amni-darro.
Dowladda ayaa ugu dambeyn sheegtay inay shacabka ka doonayso inay la shaqeeyaan hay’adaha amniga, ayna soo gudbiyaan xog kasta oo la xiriirta dhaq-dhaqaaqyada amni-darro, si loo xaqiijiyo amniga magaalada Baydhabo iyo guud ahaan Koonfur Galbeed.
#DHAMAAD#
Hoos ka akhri war saxaafadeedka
