Odayaasha dhaqanka ee Koonfur Galbeed ayaa ka hadlay dagaalladii dhawaan ka dhacay magaalada Baydhaba iyo duleedkeeda, iyagoo si adag uga digay in khilaafaadka siyaasadeed iyo kuwa amni lagu xalliyo dagaal iyo awood ciidan.
Afhayeenka Odayaasha Dhaqanka, Malaaq Deerow, ayaa sheegay in bulshada Koonfur Galbeed aysan marnaba aqbali doonin in deegaannadooda lagu soo duulo, isla markaana kooxo hubeysan loo adeegsado khilaafaadka siyaasadeed.
Malaaq Deerow ayaa tilmaamay in aan la aqbali karin xaalad uu ku sheegay in Koonfur Galbeed lagu soo duulo, iyadoo ay garab socdaan xubno siyaasadeed iyo ciidan, isagoo carrabka ku adkeeyay in dadka deegaanka ay mudan yihiin nabad iyo xasillooni.
Odayaasha dhaqanka ayaa sidoo kale ugu baaqay dhinacyada isku haya xaaladda Koonfur Galbeed inay joojiyaan dagaallada, kana fogaadaan tallaabo kasta oo keeni karta in shacabka Baydhaba ay mar kale wajahaan dhimasho, dhaawac, barakac iyo burbur hantiyeed.
Waxay ku baaqeen in khilaafaadka siyaasadeed lagu xalliyo wada-hadal, nabad iyo isu-tanaasul, iyadoo la ilaalinayo midnimada bulshada iyo xasilloonida magaalada Baydhaba.
Bayaanka odayaasha ayaa kusoo beegmaya xilli Baydhaba ay ka dhacayeen dagaallo sababay khasaare iyo cabsi xooggan oo soo wajahday shacabka, iyadoo weli walaac laga qabo in xiisaddu mar kale isu beddesho dagaal ballaaran.
Odayaasha dhaqanka ayaa ugu dambeyn ugu baaqay dhammaan dhinacyada inay mas’uuliyad muujiyaan, shacabka ka ilaaliyaan colaadaha, isla markaana mudnaanta koowaad siiyaan nabadda, wadajirka bulshada iyo badbaadinta dadka rayidka ah.
Halkan hoose ka daawo Hadalka Malaaq Deerow
https://x.com/i/status/2089669714981142703
