Wasiirka Arrimaha Dibadda iyo Iskaashiga Caalamiga ah ee Soomaaliya, H.E. Abdisalam Dhaay, ayaa xarunta Wasaaradda Arrimaha Dibadda ku qaabilay Safiirka Jamhuuriyadda Shacabka Shiinaha u fadhiya Soomaaliya, H.E. Wang Yu.
Kulanka ayaa diiradda lagu saaray xoojinta xiriirka iyo iskaashiga labada dal, iyadoo Soomaaliya ay uga mahadcelisay dowladda Shiinaha taageerada ay siiso Soomaaliya.
Sidoo kale, Soomaaliya waxay si gaar ah u bogaadisay taageerada Shiinaha ee dhismaha Xarunta Qurba-joogta (Diaspora Centre) oo laga hirgeliyay xarunta Wasaaradda Arrimaha Dibadda, taas oo loogu talagalay in lagu xoojiyo xiriirka dowladda iyo Soomaalida ku nool dibadda.
Labada dhinac ayaa sidoo kale adkeeyay muhiimadda ay leedahay in la sii xoojiyo xiriirka diblomaasiyadeed, iskaashiga dhaqaale iyo mashaariicda horumarineed ee u dhexeeya Soomaaliya iyo Shiinaha.
Dowladda Soomaaliya ayaa mar kale xaqiijisay sida ay uga go’an tahay horumarinta xiriir waara oo istiraatiiji ah oo ay la leedahay Shiinaha, iyadoo labada dal ay leeyihiin iskaashi dhinacyo badan leh.
