Guddoomiyaha Golaha Shacabka ee Baarlamaanka Jamhuuriyadda Federaalka Soomaaliya, Mudane Cabdulqaadir Maxamed Nuur (Jaamac), ayaa xafiiskiisa ku qaabilay Safiirka Boqortooyada Sacuudi Carabiya u fadhiya Soomaaliya, Mudane Ahmed Mohammed Almowallad.
Kulanka ayaa bilowgiisa Safiir Ahmed Mohammed Almowallad ugu hambalyeeyey Guddoomiye Cabdulqaadir Maxamed Nuur (Jaamac) doorashadii loogu doortay xilka Guddoomiyaha Golaha Shacabka ee BJFS, isagoo u rajeeyey inuu si guul leh uga soo baxo waajibaadka loo igmaday.
Labada dhinac ayaa sidoo kale si qoto dheer uga wada hadlay xoojinta xiriirka soo jireenka ah, walaaltinimada iyo iskaashiga qotada dheer ee ka dhexeeya Soomaaliya iyo Boqortooyada Sacuudi Carabiya.
Guddoomiye Cabdulqaadir Maxamed Nuur (Jaamac) ayaa dhankiisa uga mahadceliyey dowladda iyo shacabka Boqortooyada Sacuudi Carabiya taageerada joogtada ah ee ay la garab taagan yihiin dowladda iyo shacabka Soomaaliyeed.
Kulanka ayaa kusoo beegmaya xilli Soomaaliya iyo Sacuudi Carabiya ay leeyihiin xiriir taariikhi ah oo ku saleysan iskaashi dhinacyo badan leh, iyadoo labada dowladood ay muhiimad gaar ah siinayaan xoojinta xiriirkooda iyo iskaashiga labada dal.
Kulanka Guddoomiyaha Golaha Shacabka iyo Safiirka Sacuudiga ayaa muujinaya muhiimadda ay labada dhinac siinayaan sii xoojinta xiriirka diblomaasiyadeed, iskaashiga iyo walaaltinimada ka dhaxaysa Soomaaliya iyo Boqortooyada Sacuudi Carabiya.
