Wasaaradda Arrimaha Dibadda iyo Iskaashiga Caalamiga ah ee Soomaaliya ayaa u yeertay Danjiraha Soomaaliya u fadhiya Serbia, Maxamed Cabdullaahi Axmed, iyadoo ku amartay inuu yimaado xarunta dhexe ee Wasaaradda Arrimaha Dibadda ee Muqdisho si uu uga qeyb qaato wadatashi rasmi ah.
Warqad rasmi ah oo ka soo baxday Wasaaradda, kuna taariikheysan 25-ka Luulyo 2026, ayaa lagu sheegay in Danjiraha loogu yeeray xarunta Wasaaradda, waxaana loo qabtay inuu yimaado muddada u dhexeysa 25-ka Luulyo ilaa 15-ka Agoosto 2026 si uu uga qeyb qaato wadatashiga rasmiga ah.
Wasaaradda ayaa sidoo kale sheegtay in Danjiraha laga filayo inuu la yimaado warbixinno, isla markaana calaamad ama arrimo khuseeya hawlaha Safaaradda uu soo gudbiyo, si loo qiimeeyo xaaladda iyo howlaha diblomaasiyadeed ee Safaaradda Soomaaliya ee Belgrade.
Danjire Maxamed Cabdullaahi Axmed ayaa ah Safiirka Soomaaliya ee Serbia, waxaana sidoo kale uu Soomaaliya uga wakiil yahay dalal kale oo uu xaruntiisu tahay Belgrade.
Bogga rasmiga ah ee Safaaradda Soomaaliya ee Serbia ayaa xaqiijinaya inuu yahay Ambassador Extraordinary and Plenipotentiary ee Soomaaliya.
U yeerista Danjiraha ayaa ku soo beegmaysa xilli ay soo baxeen warar ku saabsan khilaaf u dhexeeya Safiirka iyo Qunsulka Safaaradda Soomaaliya ee Belgrade, iyadoo warbaahinta bulshada lagu baahiyay eedeymo sheegaya in Qunsulka loo diiday inuu galo xarunta Safaaradda.
Si kastaba, warqadda Wasaaradda ee la arkay si toos ah uma xusin sababtaas, sidaas darteed faahfaahinta khilaafka iyo sababta rasmiga ah ee u yeerista Danjiraha weli waxay u baahan yihiin xaqiijin dheeraad ah.
Xiriirka Soomaaliya iyo Serbia ayaa sannadihii u dambeeyay lahaa iskaashi dhinacyo badan ah, gaar ahaan arrimaha amniga, tababarrada iyo xiriirka diblomaasiyadeed.
Safaaradda Soomaaliya ee Belgrade ayaa sidoo kale dhowaan martigelisay masuuliyiin sare oo Serbian ah.
Waxaan la socon doontaan wax walba oo kusoo kordha xaaladda iyo haddii Wasaaradda Arrimaha Dibadda ay soo saarto faahfaahin rasmi ah oo ku saabsan sababta keentay u yeerista Danjiraha. :::
