Wafdi uu hoggaaminayay Guddoomiyaha Gobolka Shabellaha Hoose, Mudane Cabdifataax Saciid Axmed Siidii, ayaa gaaray deegaanka Gendershe ee Gobolka Shabellaha Hoose, halkaas oo ay ka bilaabeen mashaariic muhiim ah oo lagu horumarinayo adeegyada bulshada iyo kaabayaasha deegaanka.
Wafdiga waxaa qeyb ka ahaa Wasiirka Kalluumeysiga iyo Dhaqaalaha Buluugga ah ee Koonfur Galbeed, Wasiir Ku-xigeenka Amniga, Wasiir Ku-xigeenka Arrimaha Gudaha, Wasiir Ku-xigeenka Dastuurka iyo Xildhibaano ka tirsan Golaha Wakiillada Koonfur Galbeed.
Mas’uuliyiinta ayaa si diirran waxaa deegaanka Gendershe ugu soo dhaweeyay maamulka deegaanka, odayaasha dhaqanka, dhalinyarada, haweenka iyo qeybaha kala duwan ee bulshada.
Intii ay ku sugnaayeen Gendershe, wafdiga ayaa kulan la qaatay bulshada deegaanka iyo laamaha amniga, iyagoo ka dhageystay baahiyaha iyo xaaladda guud ee deegaanka, gaar ahaan dhinacyada amniga iyo adeegyada bulshada.
Sidoo kale, wafdiga ayaa dhagax-dhigay Xarunta Maamulka Deegaanka Gendershe iyo Saldhigga Booliska, kuwaas oo qeyb ka ah mashaariicda horumarineed ee laga hirgelinayo deegaanka.
Mashaariicdan ayaa la filayaa inay door muhiim ah ka qaataan xoojinta amniga, horumarinta adeegyada bulshada, adkeynta maamulka deegaanka iyo dhismaha kaabayaasha muhiimka ah, iyadoo sidoo kale la rajeynayo inay wax ka tari doonaan baahiyaha ay qabaan shacabka Gendershe.
Booqashada wafdiga iyo dhagax-dhigga mashaariicdan ayaa kusoo aadaya xilli deegaanada Gobolka Shabellaha Hoose ay ka socdaan dadaallo lagu horumarinayo adeegyada aasaasiga ah iyo xoojinta amniga.
