Wasiirka Gaashaandhigga Jamhuuriyadda Federaalka Soomaaliya, Mudane Axmed Macallin Fiqi, ayaa khudbad ka jeediyey munaasabadda daahfurka Hindisaha Istaraatiijiga ah ee “Wariyayaasha Nabadda”, kaas oo uu fulinayo Isbahaysiga Dalalka Islaamka ee Ciidamada La-dagaallanka Argagixisada (IMCTC).
Wasiir Fiqi ayaa sheegay in warbaahintu ay door muhiim ah ka qaadan karto dadaallada lagula dagaallamayo argagixisada, gaar ahaan wacyigelinta bulshada, ka hortagga dacaayadaha iyo marin-habaabinta ay adeegsadaan kooxaha argagixisada.
Wuxuu tilmaamay in loo baahan yahay in wariyayaashu ay si masuuliyad leh uga shaqeeyaan faafinta xog sugan, kor u qaadista wacyiga bulshada iyo xoojinta fikirka dhexdhexaadka ah, si loo yareeyo saameynta fikirrada xagjirka ah.
Sidoo kale, Wasiirka ayaa bogaadiyey taageerada uu Isbahaysiga IMCTC iyo Boqortooyada Sacuudi Carabiya u fidiyaan Soomaaliya, gaar ahaan dadaallada dowladda ee ku aaddan la-dagaallanka argagixisada iyo xoojinta amniga dalka.
Hindisaha “Wariyayaasha Nabadda” ayaa diiradda saaraya sidii loo xoojin lahaa awoodda iyo fahamka saxafiyiinta ee ku aaddan kaalin ay ka qaataan nabadda, xasilloonida iyo ka hortagga fikirrada xagjirka ah.
Munaasabadda ayaa sidoo kale muujisay muhiimadda ay leedahay iskaashiga u dhexeeya dowladda, warbaahinta iyo hay’adaha caalamiga ah si loo dhiso bulsho xog-ogaal ah oo ka qayb qaadata nabadeynta iyo xasilloonida Soomaaliya.
Halkan hoose khudbada wasiirka oo af carabi ah
https://x.com/Warsannews/status/2091332972788036038
