Wasiirka Maaliyadda Koonfur Galbeed, Xuseen Maxamed Xaaji, oo uu wehelinayay Wasiirka Caafimaadka, Dr. Cabdulqaadir Shariif Sheekhuna Maye, ayaa magaalada Baraawe kulan kula yeeshay masuuliyiinta Maaliyadda iyo hay’adaha amniga ee deegaanka.
Kulanka ayaa diiradda lagu saaray kor u qaadista dakhliga dowladda, xoojinta wada-shaqeynta hay’adaha iyo hirgelinta Sharciga Canshuuraha Koonfur Galbeed.
Masuuliyiinta ayaa isla eegay sidii loo horumarin lahaa nidaamka dakhliga, loona xoojin lahaa habraacyada canshuur uruurinta, iyadoo muhiimad gaar ah la siinayo wada-shaqeyn dhow oo dhex marta hay’adaha Maaliyadda iyo laamaha amniga.
Wasiirrada iyo masuuliyiinta kulanka ka qeybgalay ayaa sidoo kale carrabka ku adkeeyay in nidaam hufan oo dakhliga lagu maamulo uu muhiim u yahay awoodda dowladda ee bixinta adeegyada bulshada iyo horumarinta adeegyada aasaasiga ah.
Sidoo kale, waxaa la tilmaamay in iskaashiga Maaliyadda iyo hay’adaha amniga uu gacan ka geysan karo xaqiijinta amniga goobaha dakhliga laga ururiyo iyo fududeynta hirgelinta shuruucda canshuuraha.
Kulankan ayaa qeyb ka ah dadaallada lagu xoojinayo maamulka maaliyadeed ee Koonfur Galbeed, iyadoo la doonayo in la kordhiyo dakhliga gudaha, la adkeeyo wada-shaqeynta hay’adaha dowladda, isla markaana la horumariyo adeegyada bulshada ee loo fidiyo shacabka.
