Dowladda Federaalka Soomaaliya iyo Isbahaysiga Milatari ee Islaamiga ah ee La-dagaallanka Argagixisada (IMCTC) ayaa magaalada Muqdisho ka wada barnaamij tababar oo soconaya muddo afar maalmood ah, kaas oo loogu magac-daray “Peace Journalists”.
Tababarkan ayaa diiradda lagu saaraya sidii loo xoojin lahaa doorka saxafiyiinta iyo warbaahinta Soomaaliyeed ee ka hortagga dacaayadaha kooxaha argagixisada, fikirka xagjirka ah iyo fariimaha marin-habaabinta ah ee bulshada lagu saameeyo.
Shirka oo hadda maraya marxaladda tababarrada iyo is-dhaafsiga aqoonta, ayaa saxafiyiinta lagu barayaa hababka lagu aqoonsado loogana hortago propaganda-da argagixisada, iyadoo sidoo kale xoogga la saarayo mas’uuliyadda warbaahinta ee ilaalinta nabadda, wacyigelinta bulshada iyo gudbinta xog sugan oo aan sii xoojinayn fariimaha kooxaha xagjirka ah.
Ka-qaybgalayaasha ayaa sidoo kale fursad u helaya inay ka doodaan caqabadaha ay warbaahintu kala kulanto tebinta arrimaha amniga iyo la-dagaallanka xagjirnimada, iyo sida loo horumarin karo xirfadaha saxafiyiinta si ay ugaalin wax-ku-ool ah uga qaataan nabad-dhisidda iyo xasilinta dalka.
Barnaamijkan ayaa qeyb ka ah dadaallada lagu doonayo in warbaahinta Soomaaliyeed laga dhigo tiir muhiim u ah ka hortagga fikirka xagjirka ah, iyadoo la adeegsanayo warbixin masuuliyad leh, xaqiiqo-ku-saleysan iyo wacyigelin bulshada gaarta.
Tababarka oo Muqdisho ka socda ayaa la filayaa inuu sii socdo maamlaha soo socda kaas oo sooconaayya afar maalmood ee loogu talagalay, iyadoo ka-qaybgalayaashu ay dhamaadka barnaamijka heli doonaan aqoon iyo xirfado dheeraad ah oo ku saabsan doorka warbaahinta ee la-dagaallanka argagixisada iyo xagjirnimada.
