Ra’iisul Wasaare Ku-xigeenka Xukuumadda Federaalka Soomaaliya, Mudane Saalax Axmed Jaamac, ayaa maanta magaalada Muqdisho si rasmi ah uga furay Madasha Isku-xirka Ganacsiga Soomaaliya iyo Shiinaha (Somalia–China Business Networking Forum), taas oo ay soo qaban-qaabisay Wasaaradda Ganacsiga iyo Warshadaha Xukuumadda Federaalka Soomaaliya.
Madasha waxaa ka qayb-galay wasiirro ka tirsan Xukuumadda Federaalka Soomaaliya, safiirrada Soomaaliya iyo Shiinaha, Rugta Ganacsiga iyo Warshadaha Soomaaliyeed, Rugta Ganacsiga Afrika iyo Shiinaha, iyo sidoo kale ganacsato iyo maalgashadeyaal ka kala socday labada dal.
Ra’iisul Wasaare Ku-xigeenka ayaa shirkadaha iyo maalgashadeyaasha Shiinaha ku dhiirrigeliyey inay ka faa’iidaystaan fursadaha maalgashi ee ka jira Soomaaliya, gaar ahaan dhinacyada kaabayaasha dhaqaalaha, wax-soo-saarka, kalluumaysiga, beeraha, tamarta, gaadiidka iyo saadka.
Waxa uu xusay in xoojinta xiriirka ganacsi iyo dhaqaale ee Soomaaliya iyo Shiinaha ay muhiim u tahay kobcinta maalgashiga, horumarinta wax-soo-saarka gudaha iyo abuurista fursado shaqo oo cusub.
Madashan ayaa sidoo kale fursad u ah ganacsatada iyo maalgashadayaasha labada dal inay yeeshaan xiriirro ganacsi oo cusub, isla markaana ay ka wada hadlaan fursadaha iskaashi iyo maalgashi ee ka jira Soomaaliya.
Dowladda Federaalka Soomaaliya ayaa sheegtay inay xoogga saarayso soo jiidashada maalgashiga shisheeye iyo abuurista jawi ganacsi oo dhiirrigeliya kobaca dhaqaalaha, shaqo-abuurka iyo horumarinta wax-soo-saarka gudaha.
Madasha Soomaaliya iyo Shiinaha ayaa loo arkaa tallaabo lagu xoojinayo xiriirka ganacsi iyo maalgashi ee labada dal, iyadoo la rajeynayo in wada-shaqeyntu horseeddo mashaariic iyo iskaashi dhaqaale oo wax-ku-ool ah.
