Guddoomiyaha Culimada Koonfur Galbeed, Sheekh Maxamuud, ayaa maanta khudbad ka jeediyey munaasabadda xuska dhalashada Suubbanaha Nabi Muxamed (NNKH) oo lagu qabtay magaalada Baydhabo.
Sheekha ayaa khudbaddiisa diiradda ku saaray muhiimadda ay leedahay jacaylka iyo ku dayashada Nabi Muxamed (NNKH), isagoo bulshada ku boorriyey inay ku dhaqmaan akhlaaqda wanaagsan, is-jacaylka iyo walaaltinimada.
Sidoo kale, Guddoomiyaha Culimada Koonfur Galbeed Sheekh Maxamuud ayaa duco u jeediyey shacabka ku nool deegaannada Koonfur Galbeed, isagoo Alle ka baryey inuu siiyo amni, caafimaad, barwaaqo iyo xasillooni, isla markaana uu ka dulqaado dhammaan dhibaatooyinka haysta bulshada.
Munaasabadda xuska ayaa magaalada Baydhabo waxaa ka qeybgalay qeybaha kala duwan ee bulshada, culimo, masuuliyiin iyo dadweyne u yimid inay xusaan dhalashada Nabi Muxamed (NNKH).
Xuskan ayaa ku soo beegmaya xilli magaalada Baydhabo iyo guud ahaan Koonfur Galbeed ay socdaan dadaallo lagu xoojinayo amniga iyo xasilloonida bulshada.
Maamulka Koonfur Galbeed ayaa maalmihii u dambeeyey sidoo kale xoogga saarayay sugidda amniga iyo iskaashiga bulshada iyo hay’adaha ammaanka.
Duco, nabad iyo midnimo ayaa ka mid ahaa fariimaha ugu muhiimsan ee laga dhaxlay munaasabadda, iyadoo shacabka loogu baaqay inay ilaashadaan walaaltinimada, is-dhexgalka bulshada iyo nabadda.
HALKAN KADAAWO 👉 https://www.facebook.com/share/v/1BmsFZi1NE/
