Hoggaamiyaha Dowladda Koonfur Galbeed Soomaaliya, Mudane Sheekh Aadan Maxamed Nuur (Madoobe), ayaa magacaabay Mudane Maxamed Sheekh Cabdullaahi (Xaayow) inuu noqdo Afhayeenka Dowladda Koonfur Galbeed.
Magacaabistan ayaa qayb ka ah isbeddellada iyo dib-u-habeynta lagu sameynayo howlaha dowladda, gaar ahaan dhinaca warbaahinta, xiriirka dadweynaha iyo gudbinta xogta rasmiga ah ee dowladda.
Afhayeenka cusub ayaa laga filayaa inuu noqdo wejiga warbaahineed ee Dowladda Koonfur Galbeed, isagoo bulshada iyo warbaahinta la wadaagi doona wararka, go’aannada iyo howlaha kala duwan ee maamulka.
Sidoo kale, magacaabista ayaa ku soo aadeysa xilli Dowladda Koonfur Galbeed ay xoogga saareyso xoojinta xiriirka ay la leedahay bulshada iyo hay’adaha warbaahinta, iyo in la helo xog rasmi ah oo si hufan loogu gudbiyo shacabka.
Maxamed Sheekh Cabdullaahi (Xaayow) ayaa hadda si rasmi ah u qabanaya xilka Afhayeenka Dowladda Koonfur Galbeed, isagoo mas’uul ka noqon doona metelaadda dhinaca warbaahinta ee xukuumadda.
