Baydhabo, Radio Warsan — Golaha Wasiirrada Dowlad Goboleedka Koonfur Galbeed ayaa go’aan ka soo saaray in ciidamo iyo saraakiil daacad u ah hoggaamiyihii hore ee maamulka Koonfur Galbeed, Cabdicasiis Xasan Maxamed Laftagareen, lagu daro liiska kooxaha iyo shaqsiyaadka ay maamulkaasi u aqoonsan yihiin argagixisada.
Go’aankan ayaa yimid kaddib kulan aan caadi ahayn oo ay yeesheen Golaha Wasiirrada Koonfur Galbeed, xilli magaalada Baydhabo iyo deegaannada ku dhow ay ka jireen xiisad siyaasadeed iyo mid amni.
Afhayeenka cusub ee Koonfur Galbeed, Maxamed Sheekh Cabdullaahi Xaayow, ayaa sheegay in go’aanka lagu saleeyay eedeymo ku saabsan xiriir iyo iskaashi u dhexeeya ciidamada Laftagareen iyo Al-Shabaab.
Afhayeenku wuxuu sheegay in ciidamadaasi ay ku sugan yihiin deegaano uu sheegay in Al-Shabaab ay ka taliso, taasina ay maamulka u arkeen inay caddeyn u tahay is-afgarad ama xiriir ka dhexeeya labada dhinac.
Sidoo kale, wuxuu soo hadal qaaday weerarradii 17-kii Agoosto ka dhacay Baydhabo, isaga oo sheegay in weerarradaasi ay ku jireen qaraxyo iyo weerarro ismiidaamin ah, kuwaas oo uu ku tilmaamay calaamado muujinaya in Al-Shabaab ay qeyb ka ahayd dagaalka.
Afhayeenka ayaa sidoo kale sheegay in meydadka dad uu ku tilmaamay xubno Al-Shabaab ah oo laga yaqaanay deegaannada Bakool lagu arkay magaalada Baydhabo kaddib dagaallada.
Si kastaba, warbaahintu si madax-bannaan uma xaqiijin sheegashada ku saabsan tirada qaraxyada iyo xiriirka tooska ah ee ciidamada Laftagareen iyo Al-Shabaab.
Maxay ka yiraahdeen dhinaca Laftagareen?
Wasiirkii hore ee Amniga Koonfur Galbeed, Xasan Cabdiqaadir, oo ka mid ah saraakiisha hoggaaminaysa ciidamada Laftagareen, ayaa si adag u diiday eedeymaha loo jeediyay.
Xasan Cabdiqaadir wuxuu sheegay in ciidamadaasi aysan wax xiriir ah la lahayn Al-Shabaab, isaga oo ku tilmaamay sababaha lagu daray liiska argagixisada inay yihiin “been abuur.”
Wuxuu sidoo kale sheegay in ciidamada ay ka qabsadeen dhinaca kale maxaabiis, isagoo ku baaqay in haddii la hayo dad Al-Shabaab ah oo ka tirsan ciidamadooda, la soo bandhigo.
Dhinaca kale, wuxuu beeniyay sheegashada ah in ciidamada Laftagareen ay wateen gaadiid qaraxyo loo adeegsaday ama ay qeyb ka ahaayeen weerarradii lagu qaaday Baydhabo.
Xiisadda Baydhabo oo weli taagan
Go’aankan ayaa kusoo beegmaya xilli Baydhabo ay dhowaan ka dhaceen dagaallo culus oo sababay dhimasho iyo dhaawac.
Illo kala duwan ayaa sheegay in ugu yaraan 30+ qof ay ku dhinteen dagaalladii bartamihii Agoosto ka dhacay gudaha iyo hareeraha magaalada.
Wasaaradda Gaashaandhigga Soomaaliya ayaa xilligaas sheegtay in weerarka ay qeyb ka ahaayeen dagaalyahanno Al-Shabaab ah iyo maleeshiyaad daacad u ah Cabdicasiis Laftagareen, kuwaas oo weeraray saldhigyo ciidan oo ku yaalla Baydhabo.
Dhanka kale, ciidamada iyo siyaasiyiinta taageersan Laftagareen ayaa sheegay inay dagaalkaasi qeyb ka ahaayeen arrimo siyaasadeed iyo awoodda maamulka Koonfur Galbeed.
Xiisadda siyaasadeed ayaa sii xoogeysatay kaddib markii Sheekh Aadan Maxamed Nuur (Aadan Madoobe) loo doortay hoggaamiyaha cusub ee Koonfur Galbeed, isagoo baarlamaanka maamulka ka helay 88 cod.
Go’aanka cusub ee Golaha Wasiirrada Koonfur Galbeed ayaa hadda furaya marxalad cusub oo khilaafka siyaasadeed iyo amni ee Baydhabo ah, iyadoo labada dhinac ay isku eedeynayaan xiriirro iyo falal halis ku ah amniga magaalada.
Radio Warsan — Codka Shacabka
