Wasiirka Amniga Dowlad-Goboleedka Koonfur Galbeed, Isaaq Maxamed Korsaar, ayaa maanta booqasho iyo kormeer ku tagay qaar ka mid ah xerooyinka ciidamada dowladda ee ku yaalla duleedka magaalada Baydhabo.
Wasiirka waxaa kormeerka ku wehlinayay Wasiirka Xannaanada Xoolaha, Wasiirka Gaadiidka, Taliyaha Birmadka, La-taliyaha Madaxweynaha iyo saraakiil kale oo ka tirsan ciidamada.
Intii uu ku guda jiray booqashada, Wasiir Korsaar ayaa bogaadiyay ciidamada, isagoo xusay doorkooda ku aaddan iska caabbinta weerarkii dhawaan lagu soo qaaday magaalada Baydhabo.
Wuxuu ciidamada kula dardaarmay inay sii xoojiyaan feejignaanta, isku-duubnida iyo diyaar-garowga, si loo adkeeyo amniga Baydhabo iyo deegaanada kale ee Koonfur Galbeed.
“Ciidanku waa laf-dhabarta amniga iyo xasilloonida shacabka, waxaana looga baahan yahay inay mar walba heegan ahaadaan,” ayuu yiri Wasiirka Amniga Koonfur Galbeed.
Dhanka kale, wararka laga helayo tuulooyinka ku dhow Baydhabo ayaa sheegaya in ciidamada dowladda ay halkaasi ka wadaan howlgallo amni, iyadoo la sheegay in ciidamada ay waddooyinka ku arkeen meydad loo maleynayo inay ka tirsan yihiin Al-Shabaab, kuwaas oo dhaawacyo kasoo gaaray dagaalladii Baydhabo ka dhacay.
Sida ay sheegeen dadka deegaanka, qaar ka mid ah meydadka ayaa la sheegay inay ku dhinteen intii loo waday duleedka magaalada.
Dadka deegaanka ayaa sidoo kale sheegay in kooxda Al-Shabaab ay dadka ku amartay inay aasaan meydadka, iyagoo ka cabsi qaba duqeymo dhanka cirka ah.
Xaaladda Baydhabo iyo duleedkeeda ayaa weli ah mid si dhow loola socdo, iyadoo ciidamada dowladda ay wadaan howlgallo lagu xaqiijinayo amniga iyo xasilloonida magaalada iyo nawaaxigeeda.
