Wasiirka Wasaraada Amniga Gudaha Dowladda Koonfur Galbeed Mudane Isack Mohamed Isack (Korsaar) oo ay Wehliyaan Wasiir Ku-xigeenka Wasaarad Arimaha Gudaha iyo Agaasimaha Guud Madaxtooyada ayaa kulan la Qaatay Madax ka socotay Hay’adda IOM oo ay Hoggaaminaysay Marwo Hannah Mary, Ku-xigeenka Madaxa Mashaariicda IOM ee Somalia.
Kulanka ayaa diiradda lagu saaray arrimaha xasilinta deegaanada Koonfur Galbeed, iyadoo si qoto dheer looga wada hadlay xoojinta iskaashiga u dhexeeya Dowladda Koonfur Galbeed iyo Hay’adda IOM iyo sidii loo dardargelin lahaa dadaallada xasilinta, nabadaynta iyo taageerada bulshooyinka ku nool deegaanada u baahan xasilooni iyo adeegyo aasaasiga ah.
Intii uu kulanku socday, waxaa sidoo kale laga wada hadlay mudnaanta xasilinta, isku-duwidda dadaallada xukuumadda iyo bah-wadaagta, taageerada bulshada, kobcinta isku-xirka hay’adaha amniga iyo kuwa xasilinta, iyo sidii loo horumarin lahaa qorshayaasha xasilinta ee Koonfur Galbeed Soomaaliya.
Wasiirada iyo Agaasimaha Guud Madaxtooyada ayaa uga mahadceliyey Hay’adda IOM Somalia taageerada joogtada ah iyo iskaashiga ay la leedahay Dowladda Koonfur Galbeed, iyagoo adkeeyey muhiimadda ay leedahay in la sii xoojiyo wada shaqaynta iyo isku-duwidda hay’adaha, si loo gaaro xasilooni waarta, nabad iyo horumar loo dhan yahay.
Dhanka kale Kulanka ayaa looga hadlay xoojinta wada-shaqeynta Dowladda Koonfur Galbeed iyo IOM, iyo sidii loo dardargelin lahaa mashaariicda iyo barnaamijyada hay’addu ka fuliso deegaannada Koonfur Galbeed.
Sidoo kale, waxaa la isku dhaafsaday aragtiyo ku saabsan baahiyaha bulshada, taageerada dadka nugul iyo barnaamijyada horumarineed, iyadoo xoogga la saaray sidii loo heli lahaa iskaashi wax-ku-ool ah oo bulshada wax uga tari kara.
Agaasimaha Guud ayaa uga mahadceliyey IOM taageerada ay siiso Soomaaliya iyo gaar ahaan bulshada ku nool Koonfur Galbeed, isagoo tilmaamay muhiimadda ay leedahay in la sii xoojiyo xiriirka iyo wada-shaqeynta labada dhinac.
IOM ayaa muddo dheer Soomaaliya ka fulinaysay barnaamijyo la xiriira socdaalka, barakaca, taageerada bulshada iyo horumarinta adeegyada, iyadoo hay’adaha dowladda kala duwan ay kala shaqeyso mashaariicda arrimahaas.
Kulankan ayaa ku soo beegmaya xilli Dowladda Koonfur Galbeed ay waddo dadaallo lagu xoojinayo iskaashiga hay’adaha caalamiga ah iyo dowladda, si loo kordhiyo taageerada iyo mashaariicda ka faa’iideysanaya bulshada.
