Wasiir Abdisalam Dhaay ayaa saxiixay Heshiiska Dalka Martigelinaya (Host Country Agreement) oo ay Soomaaliya la gashay UNOPS, hay’adda Qaramada Midoobay u qaabilsan adeegyada mashaariicda.
Heshiiskan ayaa si rasmi ah u qeexaya joogitaanka iyo howlaha UNOPS ee Soomaaliya, iyadoo howlaha hay’addu ay ku fulinayso hannaan dhismeed oo ixtiraamaya lahaanshaha qaran iyo mudnaanta dowladda Soomaaliya.
Heshiiska ayaa la filayaa inuu sii xoojiyo iskaashiga Soomaaliya iyo UNOPS, isla markaana caddeeyo qaabka ay hay’addu uga shaqeynayso dalka.
Dhanka kale, Wasiirka Arrimaha Dibadda iyo Iskaashiga Caalamiga ah ee Soomaaliya, Abdisalam Dhaay, ayaa maanta Muqdisho ku qaabilay Dr. Maryan Qaasim, Guddoomiyaha Guddiga Madaxa-bannaan ee Xuquuqda Aadanaha Soomaaliya, iyo xubno ka tirsan guddiga.
Kulanka ayaa looga hadlay taageerada loo fidinayo Guddiga Xuquuqda Aadanaha Soomaaliya, gaar ahaan dadaallada lagu doonayo in guddigu ku helo aqoonsi caalami ah, taas oo muhiim u ah xoojinta doorkiisa iyo madax-bannaanidiisa hay’adeed.
