Magaalada Dhuusamareeb ee Caasimadda Galmudug ayaa waxaa lagu wadaa in uu ka furmo shir u dhaxeeya Madaxda Dowladda Federaalka Soomaaliya iyo dowlad Goboleedyada dalka kajira,kaa soo looga arrinsanayo xalka gaarista Arrimaha doorashada.
Shirkaan ayaa ka dhashay shir ay dhawaan Dhuusamareeb ku yeesheen Madaxda Dowlad Goboleedyada, iyaga oo Madaxda Sare ee dowladda ugu baaqay inay wajiga labaad ee Shirka kasoo qeyb galaan si loo wada tashado.
Madaxtooyada Soomaaliya ayaa shaacisay in shirkaasi uu guddoomin doono Madaxweyne Maxamed Cabdullaahi Farmaajo, isla markaana looga hadli doono hannaanka geeddi socodka siyaasadeed iyo amni ee dalka, iyo qabsoomidda doorasho waafaqsan dastuurka, sharciga doorashooyinka iyo xeerarka dalka.
Magaalada Dhuusamareeb waxaa ku sugan Madaxweyne Farmaajo, Ra’iisul Wasaare Kheyre, Madaxweynaha Jubbaland oo xalay dib ugu laabtay Dhuusamareeb, iyo Madaxda Maamulada Koonfur Galbeed, Hir-Shabeelle iyo Galmudug,waxaana la filayaa in uu Maanta dib ugu laabto Dhuusamareeb Madaxweynaha Puntland Saciid Cabdullaahi Deni.
Xalay Magaalada Dhuusamareeb waxaa ka dhacay kulamo u dhaxeeyay Madaxweyne Farmaajo iyo Madaxda Dowlad Goboleedyada marka laga reebo Madaxweynaha Jubbaland, iyaga oo ka arrinsanayay sida loo wajahayo shirka ay wada yeelan doonaan.
Ammaanka Magaalada Dhuusamareeb ayaa aad loo adkeeyay,waxaana ku sugan Ciidamo kala duwan oo ka tirsan kuwa dowladda Soomaaliya iyo Ciidamo gaar ah oo ay wataan Madaxda Sare ee dowladda iyo Dowlad goboleedyada.
Dhanka kale Madaxweynaha Dowlada Jubbaland Mudane Axmed Maxamed Islaam ayaa gaaray Magaalada Dhuusomareeb ee Caasimada Galmudug.
Waxaa Madaxweynahu uu Safar Dhulka ah kaga baxay Magaalada Cadaado isagoo sii maray deegaano kala duwan halkaas oo dadweynaha ku nool ay Madaxweynaha soo dhaweeyeen.
Madaxweyne Axmed Maxamed Islaam waxaa uu Magaalada Dhuusomareeb u yimid ka qaybgalka shirka Dowlada Dhexe iyo Dowladaha Xubnaha ka ah kaasoo dhawaan ka furmaya Magaalada Dhuusomareeb ee caasimada Galmudug.
Laabashada Axmed Madoobe ayaa ku soo beegantay wax yar ka dib markii uu Dhuusamareeb gaaray Madaxweynaha Somalia Maxamed C/llaahi Farmaajo oo aysan Axmed madoobe isku fiicneyn.
Dadka falanqeeya siyaasadda ayaa aaminsan Axmed Madoobe booqashada uu ku tagay Cadaado uu isaga mashquulinayey si uu uga baaqsado ka qeyb galka soo dhaweynta Madaxweyne Farmaajo loogu sameynayey Dhuusamareeb.