Sii-hayaha xilka Ra’iisul wasaaraha dalka Mahdi Maxamed Guuleed ayaa guddi u magacaabay dhacdadii galinkii dambe ee shalay ka dhex dhacday xabsiga dhexe ee Xamar.
Guddigan loo magacaabay xaqiiqa raadinta shaqaaqadii ka dhex dhacday Xabsiga Dhexe ee Xamar ayaa ka kooban shan xubnood, waxayna soo baari doonaan sababta keentay weerarkaas iyo hadii ay jirto cid fududeysay, sida aan ka soo xiganay xubno ka tirsan xukuumadda.
Taliyaha ciidanka Asluubta Soomaaliya Jeneraal Mahad Cabdiraxmaan Aadan oo saq-dhexe ee xalay faahfaahin aan dhameystirneyn ka bixiyey weerarkaas ayaa sheegay in ay fulyeen qaar ka mid ah maxaabiixtii ku xirneyd xabsiga, kuwaas oo askari ka marooqsaday qorigiisa, kadibna toogtay.
Taliyaha Asluubtu haba yaraatee sooma bandhigin khasaarihii labada dhinac ee ka dhashay weerarkaas, sidoo kale waxa uu ka gaabsaday inay jiraan maxaabiis ka baxsatay xabsiga, intii uu iska hor imaadku socday.
Waxaa la sheegay in uu baxsaday nin ka mid ah ragii ka dagaalamayey gudaha xabsiga, kaas oo qof shacab ah banaanka ku sii dilay, isla markaana ku baxsaday mooto uu si xoog ah ku kaxeystay.
Saraakiil ka tirsan booliska Soomaaliya ayaa noo xaqiijiyey in afar ka mid ah kooxdii weerarka fulisay la toogtay, halka ugu yaraan laba kalena dhawac lagu qabtay, waxayna maxaabiista weerarkan fulisay ku xirnaayeen qeybta xabsi daa’inka ee xabsiga dhexe.
Wasiirka Caddaaladda ee xukuumadda federaalka Soomaaliya Xasan Xuseen Xaaji, oo la hadlay warbaahinta dowladda, ayaa sheegay in la baarayo sida uu hubka ku galay gacanta maxaabiista.
“Waxaa socda baaritaan la xiriira habkii uu falkaas ku dhacay iyo sidii uu u dhacay, waxaana rajeyneynaa in lasoo gabogabeyn doono baaritaankaas. waxaan kaloo rajeyneynaa in cid walba oo fududeysay in hubkaas uu gacanta u galo nimankaas rabshada kiciyay lagu qaadi doono oo la horgeyn doono sharciga” ayuu yiri Wasiirka Caddaaladda.
