Waxaa maanta magaalada muqdisho lagu soo xiray shirkii wadatashiga aayaha Somalia oo ay ka qeybgalaayen Madaxda Dowlada iyo kuwa maamul Goboleedyada dalka.
Shirka ayaa waxaa manata soo xiray Madaxweynaha Dowlada Federaalka Soomaaliya Xasan Sheekh Maxamuud waxa uuna xiritaanka shirka ka hor halkaasi ka jeediyay talooyinka suuragalin lahaa wax wadaqabsiga Soomaalida.
Shirka ayaa intuu uu socday waxaa looga dhawaaqay barnaamijyo lagu sheegay Guul wade iyo Heegan oo lagu tayeenayo Ciidamada Qalabka sida ee Soomaaliya iyo sidii hormarkooda looga shaqeyn lahaa.
Madaxweynaha Soomaaliya ayaa sheegay in Shirkaan uu yahay mid ahmiyad gaar ah u leh Soomaaliya islamarkaana Ummadda Soomaaliyeed Guul u horseedi kara.
Madashan ayaa noqoneysa tii ugu horeysey ee ay ka soo wada qeyb galaan dhammaan madaxda Dowladda Federaalka Soomaaliya iyo madaxda maamul goboleedyada dalka ka jira.
Waxaa madasha maanta looga munaaqishooday arrimaha siyaasadda, amniga iyo horumarka laga sameeyay barnaamijyada kale ee la xiriira Cahdiga Cusub (New Deal).
Barnaamijka Cahdiga Cusub ayaa ah hab la isugu dubbarido kaalmada la siiyo Soomaaliya, iyado saddexdii sanno ee la soo dhaafay lacag dhan 650 milyan oo dollar lagu bixiyey barnaamijyo ay isku afgarteen dowladda iyo beesha caalamka.
Waxaa sidoo kale Shirka looga dooday Hanaanka Doorasho Ee Soomaaliya Sanadka 2016-ka,iyadoo sidoo kale 12-ka Bishaan la sheegay in Shir looga hadlayo Arrimaha Soomaaliya uu isla muqdisho ka furmo,waxaana Macquul ah in Madaxweyneyaasha Maamul Goboleedyada ay sii joogaan Muqdisho Afarta Maalin ee ka harsan .
