Baydhabo-{WMN}- Dowlada Ingiriiska ayaa ku dhawaaqday 10 maalin oo baroor diiq ah waxaana la hakiyay dhamaan kulamada Siyaasada Ciyaaraha & Madadaalada ka dib geeridii ku timid Boqoradii dalkaas Queen Elizabeth II oo ahayd boqoradii ugu taariikhda dheereyd taariikhda Boqortooyada Ingiriiska taasoo ku dhimatey Qasriga Balmoral oo ku yaala Scotland.
Waxa hoos loo dhigay dhamaan calamada Boqortooyada Britain iyo afarta mandaqadood ee Boqortooyada Ingiriiska sidoo kale dalalka reer galbeedka qaarkood iyo mareykanka ayaa calamadooda hoos loo dhigay.
Boqoradu waxay ahayd 96 jir, 70 sannadood oo ka mid ah cimrigeeda waxay ahayd boqorad. Qoyskeeda ayaa ku sugan qasriga ay ku lahayd magaalada Balmoral oo ku yaalla Scotland.
Boqorada waxa la caleemo saarey oo taajka loo xiray sannadkii 1952kii, munaasabdii caleemo saarka ee waagaas waxay wax badan ka bedeshay qaab dhismeedka bulshada Britain iyo wadamada ay madaxda u ahayd.
Wiilkeeda curad Ameer Charles ayaa loo caleemo saarayaa Boqortooyada Britain. barxadda kasoo horjeeda dhismaha Qasriga Buckingham waxa ku suggan dad badan oo isugu jira bulshada Britain iyo dalxiisayaal.
Boqoradda ayaa la soo shaqaysay illaa 15 ra’iisal wasaare, laba maalmood ka hor, waxaa boqoradda geeriyootay ay xilka u kala wareejisay, ra’iisal wasaarihii hore ee UK Boris Johnson iyo ra’iisal wasaaraha cusub Liz Truiss.
Qasriga Buckingham hortiisa waxa lagu xardhayaa ogaysiiska dhimashada boqoradda, waxaana lagu daaabacay mareegta qasriga, iyada oo la isugu yeedhi doono Baarlamanka dalka Britain.
Meydka Boqoradda waxa maalmo gudahood lagu soo qaadi doonaa baabuur gaar ah, waxaana la keeni doonaa Qasriga Buckingham Palace.
