Gaari nooca Soomaalida u taqaano Caasi ama Homey oo ay saarnaayeen dad Shacab ah ayaa Maanta waxaa uu qarax ku qabsaday degaanka Xaawa Cabdi oo kuyaalla wadada u dhaxeysa Muqdisho iyo Afgooye.
Gaariga oo khudaad ka keenay dhinaca degmada Afgooye ayaa kusoo wajahnaa Magaalada Muqdisho, waxaana goobjoogayaal sheegeen in miino nooca dhulka lagu Aaso ah ay qabsaday, iyada oo inta la xaqiijiyay lix qof oo ay ku jiraan Carruur ay ku geeriyoodeen qaraxaas tiro kalena ay ku dhaawacmeen.
Ciidamo katirsan kuwa dowladda Soomaaliya ayaa gaaray halka uu qaraxa ka dhacay, iyaga oo gurmad u sameeyay dadkii ku dhaawacmay oo loo soo qaaday magaalada Caasimadda ah ee Muqdisho.
Wadada xiriirisa Muqdisho iyo Afgooye ayaa waxaa dhowr jeer ka dhacay qaraxyo miino oo lala eegtay Ciidammo katirsan kuwa dowladda Soomaaliya iyo howlgalka ATMIS, waxaana mararka qaar ay khasaaro kasoo gaartaa dad Shacab ah.
