Waxaa Xarunta Baarlamaanka dowlad Goboleedka Puntland ee magaalada Garoowe la wareegay Ciidamo gaar ah oo ka tirsan kuwa PMPF ee Puntland, kuwaasi oo la sheegay inuu ku amray Madaxweyne Saciid Cabdullaahi Deni inay qabsadaan Xaruntaasi.
Ciidamo farabadan oo ka tirsan kuwa PMPF oo hubeysan ayaa la wareegay gebi ahaan xarunta Baarlamaanka Maamulka, isla markaana waxaa ciidamada qaarkood ay gudaha u galeen xarunta, halka qaar kalena ay xireen waddooyinka soo gala iyo kuwa kabaxa.
Wararka qaar ayaa ku waramaya in xaruntaas loo qorsheeyey iney ku shaqeeyaan guddiga xallinta Khilaafaadka doorashada Puntland, Tallaabadan ayaa timid kadib markii la isku mari waayay wadahadal la doonayay in guddoonka Baarlamanku uu xarunta ku wareejiyo guddiga xallinta Khilaafaadka doorashada.
Dhinaca kale, siyaasiyiinta mucaaradka Puntland ayaa diiday guddiga Xallinta Khilaafaadka Doorashada ee uu dhawaan magacaabay Madaxweynaha dowlad Goboleedka Puntland ee muddo xileedkiisu dhamaadka yahay Siciid Cabdullaahi Deni.
Guddoomiyaha Baarlamaanka iyo xubnaha katirsan mucaaradka ayaa la filayaa inay ku eedeeyaan Madaxweyne Deni inuu afduub kula wareegay xaruntii Baarlamaanka, xilli ay xildhibaanada ku howlanaayeen inay dhameystiraan shaqooyin u harsan.
