Wafdi uu hoggaaminayo Wasiirka Wasaaradda Maaliyadda Xukuumadda Federaalka Soomaaliya, Biixi Iimaan Cige ayaa Dalka Maraykanka ka billaabay wadahadallo la xiriira saamaynta dhaqale ee ka dhalatay xaaladaha Cakiran ee Caalamka.
Kulankaan waxaa diiradda lagu saaray dhibaatooyinka laga dhaxlay dhinacyo kala duwan sida Amniga, Isbaddelka Juqaraafiyaded iyo tan Cimillada oo si toos ah u taabanaya dhaqaalaha Soomaaliya sida hadalka loo dhigay.
Wasiir Biixi Iimaan iyo Wafdiga la socda ayaa Soomaaliya ku metalaya Shirka ka dhacaya Magaalada Washington DC ee looga hadlayo Xiliga guga ee Bangiga Adduunka iyo Hay’adda Lacagta Adduunka ee IMF.
Biixi Waxa uu kulan gaar ah la qaatay mas’uuliyiin kala duwan sida Madaxweyne ku xigeenka Bangiga Adduunka ee Dalalka Bariga iyo Koofurta Afrika, Ndiame Diop oo ay kawada hadleen xoojinta iskaashiga ka dhex jira.
Soomaaliya ayaa horumar ka samaysay xoojinta dakhliga gudaha, horumarinta maamulka maaliyadda guud ahaan iyo kobcinta dhaqaalaha Dalka si loo gaaro horumar waara sida lagu yiri warka kasoo baxay Wasaaradda Maaliyadda Xukuumadda Federaalka Soomaaliya.
