Madaxweynaha Shiinaha, Xi Jinping ayaa dhigiisa Mareykanka, Donald Trump uga digay inuu farogaliyo Jasiiradda ay sheegato ee Taiwan.
Xi Jinping ayaa hadalkan ka sheegay kulan uu magaalada Beijing kula yeeshay Madaxweynaha Mareykanka Donald Trump, sida ay baahisay wakaaladda wararka dowladda Shiinaha ee Xinhua.
Madaxweynaha Shiinaha ayaa sheegay in arrinta Taiwan ay tahay qodobka ugu muhiimsan ee xiriirka China iyo Mareykanka,” isagoo xusay in haddii si wanaagsan loo wajaho ay horseedi karto xasillooni guud oo labada dhinac ah.
“Haddii aan si sax ah loo maareyn, labada dal waxay wajihi karaan isku dhac iyo xitaa colaad halis gelisa xiriirka guud ee labada dhinac,” ayuu yiri Xi Jinping.
Sidoo kale, Xi wuxuu sheegay in nabadda marinka u dhexeeya Taiwan iyo Shiinaha aysan is waafaqi karin madax-bannaanida Taiwan, isagoo ku tilmaamay sida dab iyo biyo aan is qaban karin.
Hadalka Madaxweynaha Shiinaha ayaa imanaya xilli ay sii kordhayaan xiisadaha siyaasadeed iyo kuwa militari ee ku saabsan Taiwan, taas oo weli ah arrin muran badan ka dhex dhalisa Beijing iyo Washington.
