Madaxweynaha Somaliland, Cabdiraxmaan Maxamed Cabdillaahi (Cirro), ayaa maanta kulan kula yeeshay Hargeysa Taliyaha Ciidamada Hawl-gallada Gaarka ah ee Maraykanka ee Afrika (SOCAFRICA), Major General Claude K. Tudor Jr., iyo wefti uu hoggaaminayay
.Sida lagu sheegay war-saxaafadeed ka soo baxay Madaxtooyada Somaliland, kulanka ayaa diiradda lagu saaray xoojinta iskaashiga amniga iyo danaha istaraatiijiga ah ee Somaliland iyo Maraykanka, gaar ahaan ilaalinta amniga Badda Cas, Gacanka Cadmeed iyo guud ahaan Gobolka Geeska Afrika.
Madaxweyne Cirro ayaa sheegay in Somaliland ay leedahay xeeb ka badan 850 kiiloomitir oo ku teedsan marinno-biyoodka muhiimka u ah ganacsiga caalamiga ah, isagoo xusay in amniga xeebaha Somaliland uu qayb ka yahay amniga gobolka iyo kan caalamkaba.
Waxa uu sidoo kale sheegay in Somaliland ay diyaar u tahay inay sii ballaadhiso iskaashiga ay la leedahay hay’adaha amniga ee Maraykanka, si wadajir ahna looga shaqeeyo la-dagaallanka argagixisada, budhcad-badeedda, dambiyada abaabulan iyo khataraha kale ee amniga.
Dhankiisa, Major General Claude K. Tudor Jr. ayaa sheegay in Maraykanka iyo Somaliland ay wadaagaan dano amni oo muhiim ah, isla markaana Washington ay diyaar u tahay inay sii xoojiso wada-shaqaynta dhinacyada amniga, xog-is-weydaarsiga iyo is-dhaafsiga khibradaha.
War-saxaafadeedka Madaxtooyada Somaliland ayaa lagu sheegay in kulanka uu ku soo dhammaaday is-afgarad ku saabsan sii xoojinta iskaashiga labada dhinac ee arrimaha amniga iyo danaha istaraatiijiga ah ee la wadaago.
