Dowladda Soomaaliya ayaa ka digtay iskaashiga dhinaca hubka iyo farsamada militari ee la sheegay inuu ka dhexeeyo Xuutiyiinta Yemen iyo kooxda Al-Shabaab, iyadoo sheegtay in arrintani ay khatar dheeraad ah ku tahay amniga dalka iyo badqabka shacabka.Wasiiru-dowlaha Arrimaha Dibadda Soomaaliya, Cali Maxamed Cumar, (Cali Balcad) oo wareysi siiyay telefishinka TRT World, ayaa sheegay in inkasta oo labada dhinac ay ku kala duwan yihiin fikirka iyo mabda’a, haddana ay iska kaashanayaan dhinacyada farsamada, taas oo uu sheegay inay kordhin karto awoodda Al-Shabaab.
Wuxuu sheegay in Al-Shabaab aysan lahayn awood farsamo oo ballaaran, balse taageerada ay ka heli karto Xuutiyiinta ay u suurtagelin karto inay waxyeello dheeraad ah u geysato shacabka Soomaaliyeed.
Wasiirku wuxuu sidoo kale sheegay in Yemen ay muddo dheer ahayd marin uu hub sharci darro ah uga soo gudbo Soomaaliya, isagoo xusay in arrintani ay jirtay xitaa ka hor soo bixitaankii Xuutiyiinta.
Dhanka kale, wasiirku wuxuu sheegay in amniga Soomaaliya uu si dhow ugu xiran yahay xaaladda Badda Cas iyo Gacanka Cadmeed, maadaama labada dhinac ay wadaagaan dano amni, dhaqaale iyo juqraafiyeed.
Wuxuu ku baaqay in dalalka ku teedsan Badda Cas iyo Gacanka Cadmeed ay iyagu hoggaamiyaan dadaallada lagu sugayo amniga marin-biyoodkaas, halkii ay ku tiirsanaan lahaayeen quwadaha shisheeye.
Cali Maxamed Cumar ayaa sheegay in joogitaanka quwadaha kala duwan ee shisheeye uu kordhin karo tartanka siyaasadeed iyo kan militari, taas oo halis gelin karta xasilloonida gobolka.
Wuxuu tusaale u soo qaatay Jabuuti oo uu sheegay inay ku yaallaan saldhigyo militari oo ay leeyihiin dalal kala duwan, isagoo ku baaqay in dalalka gobolka ay yeeshaan hannaan wadajir ah oo ay ku xaqiijiyaan amniga Badda Cas iyo Gacanka Cadmeed.
Wasiirku wuxuu carrabka ku adkeeyay in haddii colaadaha Yemen iyo xiisadaha Bariga Dhexe ay sii fidaan ay saameyn ku yeelan karaan Soomaaliya, maadaama dalka uu ku yaallo meel istaraatiiji ah oo isku xirta Afrika iyo Bariga Dhexe.
