Dowladda Federaalka Soomaaliya ayaa si adag u cambaaraysay tallaabada Israa’iil ay ku sheegtay inay safiir u magacawday magaalada Hargeysa, iyo dhagax-dhigga dhisme ay ku sheegtay safaarad ku taalla Somaliland.
War-saxaafadeed ay Wasaaradda Arrimaha Dibadda iyo Iskaashiga Caalamiga ah soo saartay 3-dii November 2026, ayay ku sheegtay in tallaabooyinkaas, oo aan oggolaansho looga haysan Dowladda Federaalka Soomaaliya, ay jebinayaan madaxbannaanida, wadajirka dhuleed iyo midnimada dalka.
Dowladda Soomaaliya ayaa sheegtay in tallaabooyinkaas ay yihiin kuwo aan waxba ka jirin, isla markaana aan lahayn wax saameyn sharci ah.
Waxay sidoo kale ku celisay in Hargeysa iyo gobolka Waqooyi Galbeed ay weli yihiin qayb aan ka go’i karin Jamhuuriyadda Federaalka Soomaaliya.
Wasaaradda ayaa xustay in aasaasidda xiriir diblomaasiyadeed iyo furitaanka xarumo diblomaasiyadeed oo joogto ah ay u baahan yihiin oggolaanshaha dowladda leh madaxbannaanida dalka, sida uu dhigayo Heshiiska Vienna ee Xiriirka Diblomaasiyadeed.
Waxay intaas ku dartay in tallaabo hal dhinac ah aysan meesha ka saari karin shuruuddaas, waxna ka beddeli karin maqaamka dhulka Soomaaliyeed.
Sidoo kale, dowladda Soomaaliya ayaa sheegtay in tallaabooyinkan ay sii xoojinayaan aqoonsigii ay Israa’iil ku dhawaaqday bishii Diseembar 2025, kaas oo ay hore u diideen Midowga Afrika, urur-goboleedka IGAD, Jaamacadda Carabta iyo Ururka Iskaashiga Islaamka.
War-saxaafadeedka ayaa sidoo kale lagu muujiyay walaaca laga qabo xaaladda amni ee Badda Cas iyo Gacanka Cadmeed, iyadoo dowladda Soomaaliya ay sheegtay in tallaabooyinka dhiirrigelinaya kala qaybsanaanta, isla markaana iska indha tiraya xuduudaha caalamku aqoonsan yahay, ay halis u yihiin inay sii kordhiyaan xiisadaha gobolka.
Dowladda Federaalka Soomaaliya ayaa Israa’iil ugu baaqday inay si degdeg ah uga laabato tallaabooyinkan, waxayna dowladaha iyo hay’adaha caalamiga ah ugu baaqday inay diidaan, kana fogaadaan wax kasta oo sharciyad siin kara.
Ugu dambayn, Soomaaliya ayaa sheegtay inay xaq u leedahay inay qaaddo dhammaan tallaabooyinka diblomaasiyadeed, siyaasadeed iyo sharci ee ku habboon, si waafaqsan sharciga caalamiga ah, si ay u difaacdo madaxbannaanideeda, midnimadeeda iyo wadajirka dhuleed ee dalka.
Wasaaradda Arrimaha Dibadda ayaa ku soo gabagabaysay war-saxaafadeedka in madaxbannaanida iyo wadajirka dhuleed ee Soomaaliya la ixtiraamo, iyadoo carrabka ku adkaysay in midnimada ummadda Soomaaliyeed aysan ahayn mid gorgortan geli karta.
