Madaxweynaha Soomaaliya, Xasan Sheekh Maxamuud, ayaa sheegay in khilaafaadka siyaasadeed ee Soomaaliya ay tahay in lagu xalliyo wadahadal ay hoggaaminayaan Soomaalida, isagoo si cad u diiday in arrimaha gudaha dalka lagu daro qorshe ama khariidad siyaasadeed (Roadmap) oo ay dejinayaan dhinacyo dibadeed.
Madaxweynaha ayaa hadalkan ka jeediyay shir ka dhacay magaalada Kampala ee dalka Uganda, kaas oo ay ka qeyb galeen madax iyo wakiillo ka socday dalalka ciidamadoodu ka joogaan Soomaaliya.
Shirka ayaa diiradda lagu saaray xaaladda amniga, mustaqbalka howlgalka Midowga Afrika ee Soomaaliya (AUSSOM), iyo caqabadaha siyaasadeed ee la xiriira geeddi-socodka doorashooyinka.
Intii uu socday shirka, qaar ka mid ah dalalka ka qeybgalay ayaa soo jeediyay in la diyaariyo khariidad siyaasadeed (Roadmap) oo lagu xallinayo khilaafaadka ka taagan doorashooyinka Soomaaliya, laguna dhiirrigeliyo wadatashi siyaasadeed oo loo dhan yahay.
Hase yeeshee, Madaxweyne Xasan Sheekh ayaa ka horyimid in arrimaha siyaasadda gudaha Soomaaliya lagu daro warmurtiyeedka shirka.
“Arrimaha siyaasadda gudaha Soomaaliya, annaga ayaa qabanayna shaqadaas, annagoo ka faa’iidaysanayna taladiinna, taageeradiinna iyo waanadiinna, balse ma aha in lagu daro warmurtiyeedkan,” ayuu yiri Madaxweynaha.
Madaxweynaha ayaa ku adkeystay in siyaasadda gudaha Soomaaliya aan loo gudbin hay’adaha caalamiga ah ama kuwa gobolka, isagoo sheegay in dowladda Federaalka aysan aqbali doonin in khilaafaadka siyaasadeed ee dalka laga dhigo ajande ay ka doodaan ururrada gobolka iyo kuwa caalamiga ah.
“Siyaasadda gudaha Soomaaliya lama caalamiyeyn karo, lamana goboleyn karo. Warmurtiyeedkani wuxuu aadayaa Midowga Afrika, Qaramada Midoobay iyo meelo kale.
Soomaaliya diyaar uma aha in arrimaheeda gudaha sidan loo gudbiyo,” ayuu yiri Xasan Sheekh.Shirka Kampala ayaa ku soo beegmaya iyadoo ay jiraan walaac isa soo taraya oo ku saabsan maalgelinta howlgalka AUSSOM iyo is-afgaranwaaga siyaasadeed ee hareeyay hannaanka doorashooyinka Soomaaliya.
Warar isa soo taraya ayaa tilmaamaya in khilaafaadka siyaasadeed ee gudaha Soomaaliya uu ka mid yahay arrimaha saameynaya taageerada caalamiga ah ee howlgalka Midowga Afrika.
Mowqifka Madaxweynaha ayaa muujinaya in dowladda Federaalka ay soo dhoweynayso taageerada beesha caalamka ee dhinacyada amniga iyo xasilloonida, balse ay si adag uga soo horjeedo in dhinacyo dibadeed door ku yeeshaan go’aaminta hannaanka siyaasadeed iyo doorashooyinka dalka.
