Taliyaha Africom ee ciidamada Mareykanka ayaa sheegay in Kenya ay tahay saaxiib muhiim ah oo door weyn ka qaata dadaallada lagu wiiqayo awoodda kooxda Al-Shabaab, maadaama ay tahay dal deris la ah Soomaaliya isla markaana si toos ah u wajahday weerarro ay kooxdaasi geysatay.
Jeneraal Dagvin Anderson ayaa sheegay in iskaashiga Kenya, Soomaaliya, Itoobiya, Jabuuti iyo dalalka kale ee gobolka uu muhiim u yahay la dagaallanka argagixisada, isagoo xusay in Al-Shabaab ay xiriir dhow la leedahay shabakadda Al-Qaacida.
“Al-Shabaab waa mid ka mid ah laamaha ugu firfircoon uguna dhaqaale badan ee Al-Qaacida, waxaana walaac naga haya in qayb ka mid ah dhaqaalaha ay hesho uu dib ugu laabto shabakadda weyn ee Al-Qaacida,” ayuu yiri Jeneraal Anderson.
Wuxuu tilmaamay in Kenya ay leedahay muhiimad gaar ah oo dhanka amniga ah, maadaama ay tahay “albaabka Bariga Afrika”, isla markaana ciidamada Kenya (KDF) ay yihiin kuwo awood leh oo door muuqda ka qaata amniga qaaradda.
“Ma ku guuleysaneynaa dagaalka Al-Shabaab?” ayay weydiiyay wariye ka tirsan Citizen Tv Kenya, waxaana uu ugu jawaabay, “Ma carqaladeynaynaa weerarrada argagixisada? Haa.
Ma sameyneynaa horumar? Haa,” ayuu yiri.Si kastaba ha ahaatee, wuxuu carrabka ku adkeeyay in xalka ugu weyn uu ku jiro gudaha Soomaaliya, islamarkaana dowladda Soomaaliya ay tahay inay qaadato hoggaanka dagaalka ka dhanka ah Al-Shabaab.
“Si kasta oo ay u bataan dalalka dibadda ee isku dayaya inay caawiyaan, ugu dambeyn waa Soomaaliya oo ay tahay inay hormuud ka noqoto dagaalkan oo ay wax ka qabato khatarta argagixisada,” ayuu yiri.
Jeneraal Anderson ayaa sheegay in iskaashiga caalamiga ah uu muhiim u yahay in cadaadis lagu sii hayo Al-Shabaab, balse mustaqbalka dagaalka uu ku xirnaan doono awoodda Soomaaliya ee ay ku dhisato ciidan iyo hay’ado amni oo awood u leh inay si madax-bannaan ula tacaalaan khatarta kooxda.
