Guddoomiyaha Degmada Bardaale ee Gobolka Bay, Maxamed Isaaq Xasan Arcase, ayaa kulan muhiim ah la yeeshay Ururka Midowga Madaarista Degmada Bardaale, kaas oo looga hadlay xaaladda waxbarashada madaarista iyo sidii loo horumarin lahaa tayada waxbarashada.
Kulanka ayaa si gaar ah diiradda loogu saaray caqabadaha horyaalla madaarista degmada, baahiyaha waxbarasho iyo sidii loo heli lahaa iskaashi wax-ku-ool ah oo lagu horumarinayo waxbarashada carruurta iyo dhalinyarada.
Guddoomiyaha Degmada Bardaale ayaa sheegay in maamulka degmada uu muhiimad gaar ah siinayo waxbarashada, isagoo ururka u ballanqaaday garab istaag iyo taageero lagu xoojinayo dadaallada waxbarasho ee ka socda degmada.
Sidoo kale, Guddoomiyuhu wuxuu carrabka ku adkeeyay in waxbarashadu ay laf-dhabar u tahay horumarka bulshada, isla markaana maalgelinta iyo taageerada waxbarashada ay door muhiim ah ka qaadanayaan dhismaha mustaqbal wanaagsan oo ay helaan jiilka soo koraya.
Dhinaca kale, Ururka Midowga Madaarista ayaa kulanka ku soo bandhigay xaaladda guud ee madaarista iyo caqabadaha ay wajahaan, iyagoo tilmaamay muhiimadda ay leedahay in la helo wada-shaqeyn joogto ah oo dhex marta maamulka degmada, madaarista iyo bulshada.
Kulanka ayaa lagu soo gabagabeeyay in la xoojiyo wada-shaqeynta iyo isku-duwidda dadaallada waxbarasho, si loo horumariyo tayada waxbarashada madaarista, loona abuuro fursado waxbarasho oo wanaagsan oo ay ka faa’iideystaan carruurta iyo dhalinyarada degmada Bardaale.
Waxbarasho tayo leh iyo iskaashi bulsho ayaa muhiim u ah horumarka degmada iyo mustaqbalka jiilka soo socda.
