Admin

Madaxweynaha Puntland Siciid Deni ayaa ugu baaqay dowladda Federaalka inay cadaadiska ciidan ka dulqaado Gobolka Gedo,si ay dowlad goboleedka Jubbaland u qabato doorasho madax bannaan oo lagusoo dooranayo xildhibaanada golaha shacabka.

“Dowladda federalka waa inay ciidamadeeda jooga Garbahaareey kala baxdaa, si ay Jubbaland u qabato doorasho xor iyo xalaal ah,” ayuu yiri madaxweyne Deno oo ka hadlayay shirka iskaashiga a beesha caalamka iyo  Soomaaliya.

“Jubbaland waxay leedahay awood sharci oo ay doorashadeeda ku maamulan karto, si lamid ah dowladdaha xubnaha dowladda federalka, arintani waxay caqabad ku tahay in la gaaro doorasho xor ah,” ayuu sii raaciyay madaxweyne Deni.

Madaxweynaha Puntland ayaa sidoo kale ku baaqay in sida ugu dhaqsiyaha badan  kulan u yeeshaan hoggaamiyaasha dowladda federalka iyo dowlad goboleedyada, si ay wax iskaga weydiiyaan walaaca laga muujinayo doorashada iyo sidii geeddi socodka doorashada loosii dargar galin lahaa.

Maxamed Xuseen Rooble, Ra’iisal Wasaaraha Somaliya ayaa maanta sheegay in uu safaro ku soo kala bixin doono Magaalooyinka Garoowe, Gaalkacyo, Dhuusamareeb iyo Kismaayo.

Ra’iisal Wasaaraha Somaliya oo ka hadlayay Shirka Somaliya iyo Saaxiibada Caalamka ayaa muujiyay in socdaalkiisu uu la xiriiro arrimaha doorashooyinka ee dalka.

“Safarkeyga ayaa hadda ku wajahan sidaan ku heshiinay Madaxweyne Deni inaan ku gaaro Garoowe, haddii Alle idlmo, oo aan kala hadlo arrimaha doorashooyinka. Sidoo kale aan soo maro Gaalkacyo, aan ku xijiyo Dhuusamareeb, ka dibna Madaxweyne Axmed Madoobe waxaan ku heshiinay marka uu ku soo noqdo Kismaayo inaan toos u aado halkaa, isaga ayaana uga fadhiyaa.” Ayuu yiri Rooble.

Madaxda Dowlad Goboleedyada qaarkood ayaa muuqaalka foggaan aragga uga qaybgalay shirkaasi, waxaana khudbado ka jeediyay Madaxwene-yaasha Jubbaland iyo Puntland.

Axmed Maxamed Islaam (Axmed Madoobe), Madaxweynaha Jubbaland ayaa shirka ka sheegay inaanay wax doorasho ahi ka dhici doonin Gobolka Gedo, illaa iyo inta gacanta Jubbaland dib looga soo celinayo gobolkaasi.

Madaxweynaha Puntland, Siciid Cabdullaahi Deni ayaa isna ku baaqay in Dowladda Federaalka ay Gobolka Gedo ku wareejiso Maamulka Jubbaland, si Jubbaland u maamusho doorashada Golaha Shacabka ee lagu qabanayo Magaalada Garbahaarey.

Safiirka Safaaradda Jamhuuriyadda federaalka Soomaaliya ee dalka Shiinaha Danjire Cawaale Cali Kullane ayaa ka qayb galay shir uu soo agaasintay Wasaaradda arrimaha dibadda ee dalka Shiinaha, iyadoo ka soo qayb galeen Safiirada wadama carabka ka jooga dalka Shiinaha.

Shirkan intii uu socday ayaa waxaa meeshaas ka hadlay oo qudbad soo dhawayn ah  safiirada  u jeediyay  madaxa xarunta cilmi baarista Shiinaha Carabta ee hagaajinta iyo horumarinta ah Mudane  Jiang Feng, isagoona uga mahadnaqay kasoo qayb galka shirka

Danjire Cawaale Cali Kullane oo inta shirka socday ka hadlay ayaa isagana halkaas ka sheegay in loo baahan yahay in la xoojiyo xariirka dalalka carabta iyo Shiinaha, lagana shaqeeyo sidii loo badin lahaa kulamada nuucan oo kale ah

Sidoo kale waxaa magaca safiirada shirkaas ka qayb galay oo ka mid yahay safiirkeena Dalka Shiinaha Cawaale Cali Kullane ku hadlay safiirka dalka Sacuudi Careebiya Danjire Turki bin Maxamed Al-maadii, isagoo halkaasna uga mahadceliyay xarunta kulankaan soo abaabushay sida ay marti qaadka ugu sameeyeen iyo wadashaqeynta dhaw ay doonayaan in ay la yeeshaan safiirada dalalka carabta.

Safiirka Cawaale oo warbaahinta  qaranka la hadlay ayaa sheegay in kulankaas uu ahaa mid muhiim ah oo xogo muhiim ah laysku waydaarsaday, waxa uuna safiirka u mahadnaqay wasaaradda Arrimaha dibadda oo wadda maalmahan dadaal lagu xoojinayo xariirka Shiinaha iyo dalalka carabta.

Safiirada dalalka Carabka ee dalka Shiinaha ayaa maalmaha soo socda lagu wadaa in sidoo kale ka qayb galaan shirar kale oo lagu xoojinayo xariirka Ccarabta iyo Shiinaha.

Madaxweynaha Dowlad Goboleedka Koonfur Galbeed Mudane Cabdicasiis Xasan Maxamed Lafta-gareen ayaa Aalada Fogaan Araga uga qeybgalay Madasha Iskaashiga Soomaaliya iyo Beesha Caalamka oo manta si rasmi ah uga furmay Magaalada Muqdisho ee Caasimada Dalka waxaa sidooo kale shirka ka qeybgalay Ra”iisul Wasaaraha Dalka Madaxda Dowlad Goboleedyada Wakiilada Beesha Caalamka iyo Dowladaha Daneeya Arimaha Soomaaliya

Madaxweynaha Dowlad Goboleedka Koonfur Galbeed Mudane Cabdicasiis Xasan Maxamed Lafta-gareen ayaa hadal jeedintiisa Madasha kaga Hadlay Arimaha Amniga,Doorashooyinka, Arimaha Siyaasada loo dhanyahay iyo Hormarada Degmooyinka ay ku tilaabsadeen.

Madaxweyne Cabdicasiis Lafta –gareen ayaa ugu Horeyn waxa uu ka hadlay Amniga Deegaanada Koonfur Galbeed iyo Labadii sano ee lasoo dhaafay waxyaabihii uqabsoomay waxaana uu xusay in lagu guulaystay Dib u xureynta Degmada Awdheegle, Sabiib, Caanoole, Janaale iyo Deegaano kale Waxaana uu sidoo kale uu xusay Madaxweynaha in dhowaan Bilaabanayo Howlgalo Dib loogu Xureynayo Maleeshiyada Argigixisada Alshabaab Goobaha ay kaga harsan yihiin Deeganada koonfur Galbeed tayeyn iyo tawabaridna loo Sameeyey Ciidamada Qeybta ka Noqonaya Howlgalka waxaana sido kale Bilaabanaya Furida Wadooyinka Degmooyinka Koonfur Galbeed iyo Wadada xiriirisa Magaalada Muqdisho iyo Magaalada Baydhabo.

Madaxweynaha Dowlad Goboleedka Koonfur Galbeed Mudane Cabdicasiiis Xasan Maxamed Lafta-gareen ayaa sido kale ka hadlay Arimaha siyaasada loo dhanyahay ee Koonfur Galbeed oo Hormaro laga gaaray sida Dib-u-Heshiisinta, Xasiloonida Siyaasadeed, Deganaansho, Hirgelinta Dhismaha Golaha Degaanka Degmooyinka.

Madaxweyne Cabdicasiis Lafta-gareen ayaa sidoo kale Madasha kaga hadlay Arimaha Doorashooyinka Waxaana uu sheegey inay muhiim tahay hirgelinta heshiiskii 17 Sep 2020 lagu soo gaaray Magaalada Muqdisho ee u dhaxeeyey Madaxda Dowlada Federaalka iyo Dowlad Goboleedyada ee la”isku Raacay Doorasho waqtigeeda ku qabsoonta Waafaqsan Heshiiska. Waxaana uu Sheegay Madaxweynaha in Marwaliba ay diyaar u yihiin Fulinta Qodobadii lagu Heshiiyey.

Ugu Danbayn Madaxweynaha Dowlad Goboleedka Koonfur Galbeed Mudane Cabdicasiis Xasan Maxamed Lafta-gareen ayaa ka Codsaday siyaasiyiinta iyo qeybaha kala duwan Bulshada in laga wada shaqeeyo Hormarka Dalka si aan Dib loogu Noqonin Cidwaliba oo ka shaqaynaysa Hormarka Dalka ayuu sheegay Madaxweynaha inuu Garab taaganyahay.

————————DHAMMAAD————————-

XAFIISKA WARFAAFINTA MADAXTOOYADA DOWLAD GOBOLEEDKA KOONFUR GALBEED.

Kismaayo, 07, December, 2020-Madaxweynaha Dowlada Jubaland Mudane Axmed Maxamed Islaam ayaa maanta kaga qeybgalay hab maqal iyo muuqaal ah shirka iskaashiga Soomaaliya iyo beesha Caalamka.

Madaxweynaha ayaa khudbadiisa diirada ku saaray Arimaha amaanka iyo Doorashooyinka waxaana uu si qoto dheer uga hadlay muhiimada ay leedahay in laga wada shaqeeyo waxyaabaha muhiimka u ah dalka xiligan xasaasiga ah.

Waxaa Madaxweynahu uu ugu horay Dowladaha iyo Saxiibada tageera Soomaaliya uga mahad celiyay dadaalka ay ku bixinayaan sidii dib loogu dhisi lahaa nabadgalyada iyo xasiloonida dalka balse waxaa uu farta ku fiiqay in ay jiraan dib u dhacyo joogta ah iyo isla xisaabtan la’aan gaar ahaan howlgalada AMISOM oo aan sidii la rabay loo fulin iyo dhismaha Ciidamada Qaranka oo aan waxba ka suurta galin.

Madaxweynaha ayaa sheegay in loo baahan yahay kahor ka bixitaanka Ciidamada AMISOM ee dalka in la helo hanaan amni oo damaanad qaadaya Nolosha dadka Shacabka ah taas oo aan ilaa hada muuqan.

Al-Shabaab ayuu Madaxweynahu sheegay in ay dardar galinayaan dhibaatada ay Shacabka ku hayaan isla markana ay lacago baad ah ka qaadan dadka Shacabka ah taasna ay dhibaato dhaqaale oo Cusub dalka galisay.

Madaxweynaha oo ka hadlayay Gobolka Gedo iyo doorka Doorashada ee Jubaland ayaa sheegay in Jubaland ay diyaar u tahay Doorashada in ay ka qeyb gasho balse aanay Doorashada ku qabanaynin gobol aanu nidaam hoos yimaada ka jirin.

Wuxuu intaas ku daray Madaxweynahu in Dowlada Federaalka ah looga baahan yahay inay arintaas si dhab ah u qaadato isla markana ay Ciidamada iyo Maamulka ay halkaas gaysay ay kasoo saarto kuwaan wareejiso Dowlada Jubaland.

Waxaa uu sheegay Madaxweynahu in ay Soomaaliya mudnaan gaar ah u leeyahiin Doorashooyinka iyagoo saamayn ku leh Hormarka dalka iyo xasiloonida wuxuu intaas ku daray Madaxweynahu in doorashada oo lagu shubto ama la boobo ay keenayso dhibaato aan kasoo kabasho lahayn

Waxaa uu sheegay in loo baahan yahay Doorasho la isla ogolyahay oo la tashiga iyo dhagaysiga dadku ay udub dhexaad u yihiin si gaar ah Arimaha Gobolada waqooyi ayuu sheegay in ay muhiim tahay in dib loo eego iyadoo aan la iska Indho tiraynin dadka tabashooyinka qaba gaar ahaan Gudoomiyaha Aqalka Sare oo mid kamid ah xilalka dalka ugu sareeya ku matala Gobolada waqooyi.

Gaba gabadii Madaxweynaha ayaa ku booriyay Xukuumada Federaalka ah inay qaadato doorka ay ku leedahay shaqada socota isla markana ay ka shaqayso sidii khilaafyada jira xal loogu heli lahaa dalkana ay uga dhici lahayd Doorasho loo dhan yahay.

DHAMAAAAD.

Madaxda dowladda Federaalka iyo kuwa dowlad goboleedyada ayaa shir kale isugu imaanaya, si loo xaliyo caqabadaha ku horgudban doorashada.

Shirka Madasha Iskaashiga Soomaaliya ee loo yaqaano Somalia Partnership Forum ee maanta ka furmay Muqdisho ayaa looga hadlay ahmiyada ay leedahay in dalka ay ka dhacdo doorasho waqtigeeda ku dhacda, isla markaana loo dhan yahay.

Wakiilka Qaramada Midoobey u qaabilsan Soomaaliya James Swan ayaa muujiyay sida loogu baahan yahay doorasho loo dhan yahay oo dhammaan dhinacyada oo dhan qeyb ka yihiin.

Sidoo kale waxa uu soo jeediyay in shir isugu yimaadaan dowladda Federaalka iyo dowlad goboleedyada, si horay loogu socdo, arrimaha jira laga hadlo.

Kaddib khudbada James Swan uu heediyay ayaa waxaa ka daba hadlay Ra’iisul Wasaare Rooble oo ku daray inuu maalmaha soo socda u socdo magaalooyinka Dhuusamareeb, Gaalkacyo iyo Garowe, sidoo kalena Muqdisho ay shir isugu imaanayaan Madaxda dowlad Goboleedyada iyo dowladda Federaalka.

Khilaafka ka taagan hannaanka doorashada iyo guddiyadii la magacaabay ayaa waxay noqdeen kuwo hakad geliyay wixii la qaban lahaa, gaar ahaan jadwalkii doorashada ee la soo saaray bishii October.

Waxaa goordhow magaalada Muqdisho ka furmay shirka Madasha Iskaashiga Soomaaliya ee Somalia Partnership Forum, kaasoo ay ka qeyb galayaan dowladda Federaalka, dowlad goboleedyada iyo Beesha Caalamka.

Shirkan oo uu furay Ra’iisul Wasaare Rooble ayaa ka hadlay doorashada Soomaaliya, marxaladihii ay soo martay wada hadaladii hannaanka doorashada, waxaana uu adkeeyay in doorashada waqtigeeda ku dhici doonto.

Ra’iisul Wasaaraha ayaa sheegay in dhowaan uu safaro ku tagayo Garowe, Gaalkacyo iyo Dhuusamareeb, isla markaana Madaxda dowlad Goboleedyada ay shir isugu imaan doonaan magaalada Muqdisho.

Wakiilka Qaramada Midoobey James Swan ayaa isna ka hadlay arrimaha doorashada iyo arrimo kale, waxaana uu soo jeediyay in doorashada ay noqoto mid loo dhan yahay oo ay qeyb ka wada yihiin dhammaan dhinacyada ay quseyso.

Madaxweynaha Puntland Saciid C/llaahi Deni oo shirka uga qeyb qaadanayay dhank qadka Zoomka ayaa ka hadlay doorashada, waxaana uu soo jeediyay in dowladda Federaalka ciidamadeeda kala baxdo Gobolka Gedo, si Jubbaland doorashada ugu qabato, sidoo kale waxaa uu ku baaqay in Guddiga doorashada ee Somaliland ay noqoto mid loo dhan yahay oo ay qeyb ka yihiin dhammaan dhinacyada ka soo jeeda Somaliland.

Shirka oo weli socda ayaa waxaa khudbado ka jeedinaya Madaxda kala duwan ee shirka ka qeyb galaya.

Madaxweynaha Somaaliya Maxamed C/llaahi Farmaajo iyo Amiirka dalka Qatar Sheekh Tamiin Bin Xamad Al-Thaani ayaa khadka taleefanka ku wada hadlay, iyaga oo ka wada hadlay Arrimo dhowr ah oo quseeya xiriirka labada dal.

Sida ay qortay Wakaalada Wararka Qatar ee QNA, Amiirka Qatar ayaa ayaa xalay fiidkii taleefanka kula soo xiriiray Madaxweyne Farmaajo.

Intii ay socdeen wada hadalada khadka taleefanka ayaa waxay dib u eegeen xiriirka labada geesoodka ee ka dhaxeeya labada dal, iyo qaababkii lagu taageeri lahaa, loona sii xoojin lahaa.

Dowladda Qatar ayaa tan iyo markii la doortay Madaxweyne Farmaajo horaantii sanadkii 2017 ayaa si dhow u taageertay dowladda uu hoggaamiyo Madaxweyne Farmaajo.

Qatar ayaa la rumeysan yahay inay mar kale taageeri doonto dib u doorashada Madaxweyne Farmaajo, si ay danaheeda Soomaaliya u ilaashato.

Qaybtii ugu horaysay talaalka Pfizer/BioNTech ee xanuunka Covid19 oo uu dhaliyo CoronaVirus ayaa la gaarsiiyay qaar ka mid ah isbitaallada iyo goobaha caafimaadka ee dalka Ingiriiska.

Illaa 50 goob ayaa laga bilaabi doonaa wajiga koowaad ee tallaalka,waxaana la geeyay sanduuqyo qaboojiyayayaal ah oo tallaalku ku jiro.

Maalinka talaadada ah ayaa saraakiisha caafimaadku sheegeen in uu talaalka si rasmi ah u bilaabanayo, dadka ugu horeeya ee la talaalayo ayaa ah shaqaalaha caafimaadka , dadka Waayeelka ah iyo dadka ku sugan goobaha dadka da’da ah lagu xanaaneeyo.

UK waxay dalbatay tallaal ku filan 40 malyuun oo qof waana dalkii labaad ee aduunka ee si buuxda u shaaciya in uu dadwaynihiisa qaadanayaan tallaalka lagaga hortagayo cudurka Covid19, dalka Ruushka ayaa horay u qaaday tallaabadaan oo kale, inkastoo hay’adda Caafimaadka aduunka ee WHO aysan wali xaqiijin waxtarka tallaalka Ruushka.

Madaxweynaha JFS Mudane Maxamed Cabdullaahi Farmaajo ayaa Xukuumadda Federaalka Soomaaliya ku bogaadiyay dadaalka ballaaran ee ay gelisay arrimaha doorashada iyo fulinta doorkii Dowladda Federaalka Soomaaliya kaga aaddanaa heshiiskii ay gaareen Madaxda Dowladda Federaalka Soomaaliya iyo Dowlad Goboleedyada dalka kaasi oo ay si wadajir ah u ansixiyeen Golaha Shacabka iyo Aqalka Sare ee Baarlamaanka Federaalka Soomaaliyeed 26-kii Sibteembar, 2020.

Madaxweyne Farmaajo ayaa adkeeyay sida ay Dowladda Federaalka Soomaaliya uga go’an tahay qabashada doorasho hufan oo ku salaysan habraacyadii lagu heshiiyay isaga oo u mahadceliyay Dowlad Goboleedyada fuliyay qaybtii kaga aaddanayd heshiiska doorashada, iyaga oo soo dhammaystiray xubnihii ay ku lahaayeen guddiyada heer Federaal iyo heer Dowlad Goboleed ee hirgelinta doorashooyinka.

“Waxa naga go’an in si buuxda loo fuliyo heshiiskii doorashada iyada oo laga fogaanayo dib-u-dhac ku yimaadda xilliga doorashada. Sidaas darteed, waxa aan Dowlad Goboleedyada aan weli soo dhammaystirin xubnaha ay ku leeyihiin guddiyada hirgelinta doorashooyinka ugu baaqayaa inay ka shaqeeyaan sidii looga dhabayn lahaa qodobbadii iyo hab-raacyadii lagu heshiiyay, aniga oo rajaynaya inay sida ugu dakhsaha badan u soo magacaabi doonaan qaybta ku hartay.” Ayuu yiri Madaxweyne Farmaajo.

Madaxweyne Maxamed Cabdullaahi Farmaajo ayaa Xukuumadda Federaalka Soomaaliya ku dhiirrigeliyay inay sii laba-jibaarto dadaalka ay ugu jirto sidii dalka loogu diyaarin lahaa jawi doorasho oo xasilloon.

-DHAMMAAD-