Dowladda Uganda ayaa maanta martigelinaysa shir aan caadi ahayn oo ay isugu imanayaan waddamada ciidamada ku leh Hawlgalka Taageerada iyo Xasilinta Midowga Afrika ee Soomaaliya (AUSSOM), iyadoo kulanka lagu lafaguri doono xaaladda amni ee Soomaaliya iyo sidii loo sii xoojin lahaa dadaallada lagu xaqiijinayo nabad waarta.
Shirkan oo socon doona muddo saddex maalmood ah, laga bilaabo 29-ka illaa 31-ka Luulyo, ayaa ka dhacaya Speke Resort Munyonyo ee magaalada Kampala.
Waxaa ka qeyb galaya madaxda dowladaha, wasiirrada gaashaandhigga, taliyeyaasha ciidamada iyo mas’uuliyiin sare oo ka socda Midowga Afrika, Qaramada Midoobay iyo ururka IGAD.
Maalinta koowaad waxaa kulmaya taliyeyaasha ciidamada ee waddamada ciidamada ku leh AUSSOM, halka maalinta xigta ay shir yeelan doonaan wasiirrada gaashaandhigga.
Kulanka ayaa lagu soo gabagabeyn doonaa shir heer madax dowladeed ah oo dhici doona 31-ka Luulyo.Dalalka ka qeybgalaya waxaa ka mid ah Uganda, Burundi, Jabuuti, Itoobiya, Masar iyo Kenya, iyadoo Soomaaliya ay sidoo kale ka qeybgalayso wada-hadallada maadaama ay tahay dalka uu howlgalka AUSSOM ka socdo.
Ajandaha shirka ayaa diiradda lagu saari doonaa qiimeynta xaaladda amni ee Soomaaliya, xoojinta isku-duwidda ciidamada, iyo dejinta qorshayaal lagu sii wado cadaadiska ka dhanka ah Al-Shabaab iyo kooxaha kale ee hubeysan ee halista ku ah Soomaaliya iyo Geeska Afrika.
Sidoo kale, waxaa la filayaa inay shirka kasoo qeybgalaan mas’uuliyiin sare oo ka socda Qaramada Midoobay, oo ay ku jiraan Ku-xigeenka Xoghayaha Guud ee Qaramada Midoobay u qaabilsan Hawlgallada Nabadda, Ku-xigeenka Ergeyga Gaarka ah ee Qaramada Midoobay u qaabilsan Soomaaliya iyo madaxa Xafiiska Taageerada Qaramada Midoobay ee Soomaaliya (UNSOS).
Dhanka Midowga Afrika, waxaa shirka ka qeybgalaya Guddoomiyaha Guddiga Midowga Afrika, Guddoomiyaha Arrimaha Siyaasadda, Nabadda iyo Amniga, iyo Ergeyga Gaarka ah ee Midowga Afrika u qaabilsan Soomaaliya ahna madaxa howlgalka AUSSOM.
Shirkan ayaa lagu qabanayaa halku-dhigga “Sii Joogteynta Hannaanka Xasilinta Soomaaliya”, iyadoo la filayo in sidoo kale looga hadlo taageerada dhaqaale, saadka iyo siyaasadda ee loo baahan yahay si howlgalka AUSSOM uu u fuliyo waajibaadkiisa.
Dowladda Uganda ayaa sheegtay in martigelinta shirkan ay muujinayso sida ay uga go’an tahay taageeridda nabadda iyo amniga gobolka, iyadoo xustay inay sii wadi doonto wada-shaqeynta ay la leedahay Midowga Afrika, Qaramada Midoobay, IGAD iyo dalalka ciidamada ku leh howlgalka.
Shirka Kampala ayaa la filayaa inuu soo saaro go’aanno lagu xoojinayo isku-duwidda militariga iyo taageerada caalamiga ah, si Soomaaliya loogu garab istaago geeddi-socodka ay kula wareegayso mas’uuliyadda amnigeeda iyo xaqiijinta xasillooni waarta.
