Admin

Wasaaradda Caafimaadka Somaliya ayaa waxay ka warbixisay xaaladihii ugu dambeeyay xanuunka COVID-19 ee dalka laga diiwaangeliyay, afar iyo labaatankii saac ee ugu dambeysay.

Wasaradda Caafimaadka ayaa warbixinta maalinlaha ah ku sheegtay in 16 xaaladood oo cusub dalka laga diiwaangeliyay, maanta oo Talaado ah.

Bukaanada cusub 15 ka mida waxaa laga diiwaangeliyay Somaliland, iyadoo Koonfur Galbeedka laga xaqiijiyay 1 kiis. Bukaanada 11 ka mida waxaa weeye rag, halka 5-ta kalana ay dumar yihiin.

Warbixinta ayaa sidoo kale lagu sheegay in xanuunka ay ka bogsadeen 27 qof, isla-markaana aanu jirin wax bukaan ah oo xanuunka ugu geeriyooday dalka, 24-kii saac ee la soo dhaafay.

Tirada guud ee xanuunka ka bogsatay ayaa gaareysa 649 qof, iyadoo bukaanada u geeriyoodayna ay tiradoodu dhan tahay 88 qof, halka tirada guud ee xanuunka laga helay dalka oo dhan ay tahay 2,658.

Maamulka Hirshabelle ayaa qiray in maleeshiyada Ururka Al Shabaab ay ku soo xoogeysanayan Gobolka Shabellaha Dhexe, ayna taasi u sahashay weerarada ay xilligan ka gaysanayan.

Maxamed Cabdiraxmaan Khayre, Wasiirka Amniga Hirshabelle ayaa tilmaamay inay tani ka dhalatay hawlgaladii dhawaan laga sameeyay Gobolka Shabellaha Hoose, ee Shabaabka looga xoreeyay dhul badan.

Wasiirka Amniga Hirshabelle oo u waramay BBC ayaa xusay in ay Dowladda Federaalka kala hadlaan in hawlgalada laga wada sameeyo Labada Shabelle, bedelkii mid qura laga samayn lahaa.

Wasiir Khayre ayaa yiri “Horey waan ugala hadalnay Dowladda Federaalka arrimahaasi. Hawlgalada inay labada dhinac ka socdaan ayaa aad u wanaagsaneyd, maadaama hadda Shabellaha Hoose oo keliya lagu weeraray nimankan, meelo badan-na laga qabsaday. Ukumankoodii iyo ajaaniibtoodii ayay u soo rarteen Shabellaha Dhexe, dhankaan waxay nooga soo gudbeen hawdka ah ee Labada Shabelle isu xira, marka taas ayaa caqabadda keentay.”

“Waayihii dambe waxay aad u soo badiyeen inay culeys soo saaraan Shabellaha Dhexe, marka sababta mar walbana keentay inay Balcad iyo nawaaxigeeda ka sameeyan dhibaatooyin, qaraxo ama weerar toos ah waxaa u sahashay inay haystaan meel ay ku cararaan oo gabaad ay ka dhigtaan.”

“Marka Labada Shabelle haddii mar uu hawlgalka ka dhici lahaa, waxaan rajayn lahayn in nimankan meel ay ku gambadaanba aysan heli lahayn, waayo ma qaybsamaan, waa niman aad u tiro yar, marba dhinac u guur guuro.”

Madaxweynaha Puntland Siciid Cabdulaahi Deni oo khudbad ka jeediyay furitaanka Kalfadhiga 46-aad ee Baarlamanka Puntland ayaa ka hadlay aragtida maamulkiisa ee shirka dowlada federaalka iyo maamulka Somaliland uga furmay Jabuuti.

Waxa uu sheegay Madaxweyne Deni in Puntland shirkaasi wax shqo ah ku laheyn, waxa uuna cadeeyay in maamulkiisa uusan aqbali doonin natiio kasta oo kasoo baxda shirkaasi ka furmay dalka Jabuuti.

“Waxaan cadaynaynaa inaan marna ogolaan doonin natiija ka soo baxda wadahadal kasta oo lala galo Somaliland oo aysan Puntland qayb ka ahayn. Puntland waxaa Somaliland kala dhexeeyo khilaaf dhuleed taas oo u baahan inaan xal ka gaarno” Ayuu yiri Madaxweyne Deni.

Maamulka Puntland ayaa marar badan codsaday in ay qeyb ka noqoto wadahadalada Dowlada federaalka Soomaaliya iyo maamulka Somaliland, hasa ahaatee dowlada federaalka ayaa dhagaha ka fureesatay dalabka Puntland.

---

Allaha u naxariistee Nuur Cumar Maxamed oo ah xildhibaan Ilhaan Cumar aabaheed, ayaa ahaa nin muddo dheer soo shaqeeyay oo dadkii yaqaannay ay ku tilmaameen inuu ahaa nin farxaan ah oo dadku ay jecelyihiin.

Warka geerida aabaheed ayey Ilhaan Cumar soo dhigtay baraheeda bulshada ee Facebook-ga iyo Twitterka. Halkaas oo farriin kooban oo af-ingiriisi ah ay ku xaqiijisay in dunida uu ka tegay aabaheed.

Farriinta Ilhaan ayaa waxa ay u qorneyd sidatan “Innaa Lilaahi Wa innaa Ilayhi raajicuun. Dhab ahaantii Allaah ayaa na abuuray isagaana u laabanaynaa. Waa murugo iyo xanuun wayn inaan aabahay Nuur Cumar Maxamed sagootiyay. Ma jiraan kalmado aan ku qeexi karo waxa uu ii ahaa iyo waxa uu u ahaa dhammaan dadkii yaqaanay ee jeclaa.”

Farrimahaas waxaa ka falceliyay kumannaan kun oo qof oo koontiyo ku kala leh barahaasi Facebook iyo Twitterka ee Ilhaan Cumar.

Nuur Cumar Maxamed nin caynkee ah ayuu ahaa?

Nuur Cumar Maxamed waxa uu yaraantii wax ku soo bartay magaalada Muqdisho halkaas oo uu kaga baxay dugsigii Allaahida ee ay Masaaridu maamuli jireen.

Waxa uu markii dambe ku biiray ciidammada milateriga Soomaaliya, halkaas oo tababarro kala duwan loogu qaaday dalalka Masar iyo Ruushka. Markii dambe Nuur Cumar, waxa uu tababare u noqday ciidammadii milateriga Soomaaliya.

Cabdulle Jimcaale Jiisow, oo ah korneel hore uga tirsanaan jiray ciidammada milateriga Soomaaliya muddana ay saaxiibo ahaayeen marxuumka, ayaa BBCda uga warramay taariikhda Nuur Cumar oo kooban.

Cabdulle Jimcaale ayaa waxa uu Nuur ku tilmaamay inuu ahaa “Nin ahlu taqwa ah ayuu ahaa, nin ahlu diin ah ayuu ahaa. Nuur waxa uu ahaa nin dadku jecelyahay oo aad iyo aad bashaash u ah. Nuur waxa uu ahaa nin farxaan ah. Nuur wuxuu lahaa calaamado dadka Ilaahay jecelyahay ay leeyihiin.” ayuu yiri Cabdulle Jimcaale.

“Nin sarkaal ah oo ciidammada Soomaaliya ka tirsanaan jiray ayuu ahaa, sidayada oo kale. Aqoontiisa kale waxa uu ahaa nin mutacalim ah oo waxbartay.”

Cabdulle Jimcaale waxa uu sheegay in Nuur Cumar oo muddo tobannaan sanadood ah ay isyaqaanneen uu ahaa nin dedaal badan oo jecel inuu waxbarto.

Markii Soomaaliya ay dhibaatada ka dhacday ee la qaxayna Nuur Cumar iyo carruurtiisa oo ay ku jirto xildhibaan Ilhaan Cumar waxa ay dib u dejin ka heleen waddanka Mareykanka, halkaas oo uu waxbarashadiisii ka sii watay.

Cabdulle Jimcaale ayaa sheegay in ninka uu Nuur ahaa laga dheehan karo carruurta uu soo koriyay iyo sida ay bulshadooda wax u tareen: “Wax badan buu dalka iyo dadkaba u soo qabtay, oo waxaa lagu xasuusan doonaa dadka uu ka tegay oo gidigood mutacilimiin ahh. Waxaa ka mid ah Ilhaan Cumar oo xildhibaan ah, weliba hooyadood way dhimatay isagaa soo koriyay oo wax soo baray, Alaha u naxariistee.

Nuur Cumar Maxamed lama shaacin waqtiga la aasi doono.

Warbaahinta caalamka kuwooda ugu afka dheer ayaa qoraya  war  cusub oo ku saabsan in Dowlada Kuuriyada Waqooyi ay bur burisay xafiis kala dhaxeeyay Kuuriyada Koonfureed , xili xiisad u dhaxeesa labada dal uu dib usoo cusboonaaday.

Dowlada  Kuuriyada Waqooyi bur burisay xafiiskan oo kuyaalay magaalada Kaesong oo kutaala xadka labada dal, xafiiskan ayaana ahaa mid ka dhaxeeyay oo labada dal kuwada shaqeenayeen.

Xafiiskan labada dal ka dhaxeeyay ayaa la furay sanadkii 2018-kii, waxaana xafiiskan loogu tala galay ka shaqeynta in xiriir isgaarsiineed yeeshaan labada dal ee Kuuriyada Waqooyi iyo mida Koonfureed.

Bur burinta xafiiska labada Kuuriya ka dhaxeesay ayaa kusoo aadeysa xili Dowlada Kuuriyada Waqooyi soo cusbooneesiisay hanjabaadyadii hore, iyagoona ugu goodiyay Kuuriyada Koonfureed in talaabo ka qaadi doonto.

Dagaalyahano katirsan Al Shabaab ayaa xalay fiidkii weerar madaafiic ah ku qaaday saldhig ciidamada AMISOM gaar ahaan kuwa ka socda dalka Jabuuti ku leeyihiin xaafada Howl-wadaag .

Ciidamada AMISOM ee ku sugnaa xerada madaafiicda Al Shabaab ku weerareen ayaa dhankooda ku jawaabay madaafiic culus, waxaana xaalad cabsi ah lasoo daristay dadka ku dhaqan magaalada Baladweyne gaar ahaan Howl-Wadaag.

Madaafiicda Al Shabaab iyo ciidamada Jabuuti is weedaarsadeen ayaan la ogeyn wali khasaaraha ka dhashay, dadka ku dhaqan magaalada Baladweyne ayaana aad u hadal haya weerarkan xalay dhacay.

Ciidamada Jabuuti ayaa saakay ku baxay howlgalana ka sameeyay aaga weerarka laga soo qaaday, mana jiro ilaa hada wax war ah oo kasoo baxay taliska AMISOM iyo maamulka magaalada Baladweyne oo ku aadan weerarka madaafiicda ah.

In ka badan 8 milyan oo qof ayaa la xaqiijiyay inay qabaan cudurka ‘coronavirus’ adduunka oo dhan.

ku dhawaad 3.8 milyan ayaa soo kabsaday, halka ugu yaraan 435,662 ay dhinteen, sida lagu sheegay xog aruurin ay sameysay jaamacada Johns Hopkins.

Mareykanka, Brazil iyo Boqortooyada UK ayaa soo sheegay dhimashada ugu badan.

Madaxa WHO Tedros Adhanom Ghebreysus ayaa uga digay wadamada feejignaan la’aan, waxaana uu sheegay in wali ay taagan halista Cudurka Corona virus.

Waxaa uu sheegay in wali ay sii kordhayso qatarka Cudurka, islamarkaana dunida laga rabo qorshe Mideysan si looga hortagga loona soo saaro talaal sahli kara in Cudurka la xakameeyo.

Somaliland maxay ku faleysaa Midnimo?

Waa isbarbardhig ku saabsan matalaadda Dowladda Federaalka ah ee Soomaaliya iyo Dowladda Somaliland.

Labada dhinac markii u horreysay ee ay is hor fariistaan waxay ahayd January, 2012. Waxay ahayd Chevening House oo ah meel aan ka fogeyn magaalada London.

Shalay ka hor, kulankii u dambeeyay wuxuu ahaa 2014 oo ay labada Madaxweyne ku kulmeen Djibouti.

Labada shir mid aniga oo suxufi ah ayaan joogay ergooyinkana gooni gooni ula kulmay. Midka kale, wafdiga Madaxweynaha ayaan ka mid ahaa oo miiska ayaan fadhiyay.

Intii u dhexeysay si dhow ayaan ula socday. Marka aan suxufinnimo ku shaqeynayay labada dhinac ayaan xog wareysanayay.

Marar kale aniga oo matalaya Soomaaliya ayaan wadahadalka uga qeyb galay Istanbul, Ankara oo ahayd kulan aqoonyahanno iyo Djibouti. Qaar kale qabanqaabada ayaan wax ku lahaa. Is arag aan la shaacinna si hoose ayaan xogtooda u helay.

Ku dhowaad dhammaantood waxaa ii muuqata in aan labada dhinac ahayn isku diyaar garow xag macluumaad iyo waliba marka ay noqoto in aan waxba lala harin ee loo bareero dhinaca kale.

Waxaan qabaa dareenka ah in ay isa soo hor fariistaan koox taqaanna waxa ay ka hadleyso iyo sida ay u dhigeyso, Iyo koox dooneysa Midnimo ay doonayaan in ay ku helaan “in ay u caqli celiyaan walaalhood.”

Istaraatiijiyada Somaliland waa in Soomaaliya ay noqoto laba dal oo koofuriyo Woqooyi ah.

Dooddu halkaa kama degto, waxba lagama beddelo, waxna kuma soo biiraan.

Waxay ku bixisay dhiig, kharash fara badan iyo borobagaanda. Waa dacaayad aan kala go’ lahayn oo dadweynaha la gaarsiiyay, laguna celceliyay.

Waxaa la hubiyay in shakhsi kastaa ay farriintu gaarto – mid awalba sidaa qabay amaba ka horreeya, mid hadda lagu qanciyo iyo mid lagu celceliyo ugu yaraan ilaa uu ka garaabo.

Waxay saaxiibbo ku yeelatay Saxaafadda Caalamiga ah, aqoonyahanno iyo diblomaasiyiin shisheeye. Xafiisyo u sameysan suuq geynta siyaasadda ayaa la kireystay.

Si doodda aan loo kala illoobin, marnabana aanay dadka madaxiisa uga bixin waxaa loo sameeyay astaamo lagu xusuusto.

Mid keliya haddii aan xuso waa Taallada ay dayaaradda Miigga ahi saaran tahay ee qof og in aad og tahay sheekadeeda murugada leh aanuu ka caajiseyn in uu mar laba iyo ka badan kuugu soo celiyo.

Somaliland shakhsiyaad beey leedahay loo bixiyay ‘mujaahiddiin’. Waxay la dagaallameen oo ay ka adkaadeen shakhsiyaad astaan looga dhigay shar oo loo bixiyay ‘faqash’.

Qof kastaa wuxuu ka qalin jebiyay Iskuulkaas furan ee ku saabsan wixii la soo maray, wax lagu daray iyo waxa hadda la haysto oo aan la heleen haddii Soomaaliya laga sii tirsanaado. Aqoontaas barashadeeda ma jirto meel ka caaggan. Waxaa lagu bartaa xafladaha, xafiisyada, goobaha ganacsiga, guryaha iyo saxaafadda bulshada, waxaana laga dhegeystaa Raadiyaha iyo TV-ga.

Iyada oo ay taasi jirto ayaa marka wadahadal la tagayo waxaa la soo xulaa dadka ugu xog ogaalsan, ugu mintidsan, qaarkood ay waxyeello toos ahi soo gaartay oo marnabana aanay suurta gal ka ahayn in uu shaki ku dhasho.

Waxaa intaa u wehliya aqoonyahanno u soo diyaariya doodda, mararka qaarna sooba raaca oo ka tirsan ergada.

Madasha ayay tagaan iyaga oo ku hubeysan Taariikh si taxaddar leh loo soo xulay, xad gudubyo iyo dhacdooyin fool xun oo dhab ah iyo qaar fasiraad aan sax ahayn laga bixiyay. Iyo wax kasta oo sax ama khalad leh ee ay Somaliland ku gar heli karto kuna caddeyn karto in xalka keliyihi uu yahay in laba dal la noqdo.

Intaa waxaa u dheer in shacab iyo Dowladba ay la xisaabtayaan wafdigu marka ay dalka ku laabtaan.

Federaalka

Soomaaliya waxaa u safta Madax ay ku jiraan qaar ku soo booday ama lagu soo dhex tuuray wafdi baxaya, xilka ay ku magacaaban yihiin awgiis ama si loo buuxiyo 4.5 beesha ay ka soo jeedaan darteed. Mararka qaar waxaa taga ergo mid kasta oo ka mid ah ay tahay markii ugu horreysay ee wadahadalkan uu ka qeyb galo.

Xubnahaas waxaa laga yaabaa in qaarkood aanay weligood tegin, akhrin, iskuna howlin in ay si qoto dheer u fahmaan doodda Somaliland waxa ay ku saleysan tahay.

In aanay aqoon taariikhda oo dhammaystiran. In aanay la socon dhacdooyinka foosha xun ee hore u dhacay, marka laga reebo in ay maqleen woqooyi waa la duqeeyay.

Iskaba daa midda ka sii culus oo ah waxa la soo hor dhigi karo ee ku qancin kara reer Somaliland in ay dantoodu ku jirto Midnimada.

Istaraatiijiyada marar badan la isku dayo in lagu iibiyo Midnimadu waa niyad wanaag iyo in la yiraahdo ‘walaalayaal midnimada ayaa ka wanaagsan tafaraaruqa ee midnimada aqbala’.

Taariikh, sharciyad iyo dood Soomaaliyeed intaba dad la geli kara Somaliland kuma yara Koofurta. Waxaa ugu badan Soomaalida ka soo jeedda Somaliland ee madax iyo shacab leh ee Muqdisho iyo ku nool kana shaqeysta gobollada oo dhan.

Qaarkood sabab kasta ha keentee Midnimada ma iibiyaan.

Qaar kalena, oo ay ku jiraan kuwo isku arsaday khabiirnimo iyo heybad, fursad looma siiyo in ay qeyb ka ahaadaan wadahadalka ama xataa ay daaha gadaashiisa ka talo bixiyaan.

Soo jeedin

Soomaaliya waa dal aad u weyn oo ka weyn Ingiriiska iyo Talyaaniga oo la isku daray.

Sidaa darteed, qof kastaa arrimaha gobolkiisa ama degaankiisa wuu kaga xog ogaalsan yahay inta kale oo dhan.

Labadii Gobol ee midoobay marka uu midkood gooni isu taago, inta u dhalatay ee sidaa taageersan iyo inta diiddaniba, ariinta waa ay uga xog ogaalsan yihiin Soomaalida inteeda kale.

Waxaan qabaa in Koofurta laga furo dood Dadweyne oo qoto dheer oo ujeeddadeedu ay tahay in ay sahasho is faham.

Dooddaasi waa in ay jawaab u heshaa weydiinta ah cinwaanka qormadan – Somaliland maxay ku faleysaa Midnimo?

Madaxda Somaliland iyo shacabka taageersan waa maxay danta ugu jirta Midnimada, ee la tusi karo, la taabsiin karo ayna ku qanci karaan?

Su’aashaas jawaabteeda waa in ay dusha ka bartaan ugu yaraan inta siyaasadda ku jirta iyo inta daneyneysa in ay gasho.

Iyaga oo intaas yaqaan, ka dib, ayay marka la soo xulo u diyaar garoobi karaan oo ay dejin karaan Istaraateejiyada wadahadalka iyo taatikada ay tahay in la adeegsado.

Yuusuf Garaad waa wasiirkii hore ee arrimaha dibedda Soomaaliya, safiirkii hore ee Soomaaliya ee QM, iyo madaxii hore ee laanta Af-Soomaaliga ee BBC

Dowladda Soomaaliya ayaa markii labaad si qarsoodi ah Ciidamo tababar ugu dirtay dalka Eritrea, iyadoo Ciidamo sanadkii hore loo qaaday dalkaas dib loogu soo celiyay Muqdisho.

Warar lagu kalsoonaan karo ayaa sheegay in diyaarado labadii habeen ee la soo dhaafay ka degayay Muqdisho ay keentay Ciidamo tababar soo dhameystay, halka kuwa kale oo cusub la qaaday.

Bilo ka hor ayay aheyd markii warbaahinta ay la hadleen waalidiinta dhalinyaro loo qoray Askarnimo oo loo sheegay in loo qaadayo dalka Qatar, waxaana markii ay waayeen xiriirkooda iyo xaaladooda lagu wargeliyay in loo qaaday dalka Eritrea oo xiriir dhow la leh Madaxweynaha Soomaaliya Maxamed C/llaahi Farmaajo.

Tirada Ciidamada cusub ee tababarka loogu qaaday Eritrea ayaa gaarayay illaa lix boqol askari, waxaana muddo bilo ku xareysnaayeen xero ay gacanta ku heysay Hey’adda NISA.

Shaki badan ayaa ka jira Ciidamada tababarka loogu qaaday iyo kuwa soo dhameystay xilliga lagu soo aadiyay oo dalku galayo kala guur siyaasadeed, waxaana Xildhibaano iyo siyaasiyiin ay arrintan walaac uga muujiyeen sababta Eritrea oo labo sano ka hor cunaqabateynta QM saartay laga qaaday in Ciidan tababar loogu diro, iyadoo ay jireen dalal horay loogu soo tababaray Ciidamada sida Jabuuti, Uganda iyo Turkiga.

Wasaaradda Boostada, Isgaarsiinta iyo Teknolojiyada ayaa soo qabanqaabisay kulan looga hadlayay arrimaha shuruudaha rukhsadaha isgaarsiinta ka dib markii 7dii Abriil 2020 ay shirkadaha AMTEL, HORMUUD, SOMTEL & GOLIS, oo wada jira ugu soo gudbiyeen Wasaaradda, cabasho ku saabsan shuruudaha rukhsadaha isgaarsiinta ee uu ku soo rogay Maamulka Hay’adda Isgaarsiinta Qaranka.

Kulankan oo ay ka soo qeybgaleen shirkadaha cabashada qabay, Maamulka Hay’adda, Guddiga Hay’adda, Xafiiska Garyaqaanka Guud iyo Wasaaradda Boostada oo gogosha dhigtay ayaa waxaa looga doodayay qodobada ay ku kala aragti duwan yihiin shirkadaha, Maamulka Hay’adda Isgaarsiinta iyo Guddoonka Hay’adda Isgaarsiinta, iyada oo dooddana uu gar-wadeen ka yahay Garyaqaanka Guud ee Qaranka.

Dood ka dib, waxay dhinacyadu hoosta ka xarriiqeen :

1.Guddiga Maamulka Hay’adda waxay ansixiyeen shuruudaha rukhsadaha 04 Febraayo 2019, iyadoo ay goobjoog ka wada yihiin. Nooca rukhsadda markaasi la ansixiyay waxay gaar u ahayd shabakadaha iyo adeegyada isgaarsiinta.2.Maamulka Hay’adda Isgaarsiinta wuxuu 2019-kii ka shaqeeyay Nidaamka Mideysan ee Rukhsadaha, kaasi oo ay dhammaan qeybaha isgaarsiintana ku jiraan.3.Hase yeeshee waxaa la isku raacay in Nidaamka Rukhsadaha Mideysan ee uu Maamulka Hay’adda uu faafiyay 31/05/2020, in uusan marin habkii go’aan-gaarista ee xeer-hoosaadka Hay’adda, taas oo uu maray midkii hore ee la ansxiyey Febraayo 2019, sida ay qabaan xeer-hoosaadka Hay’adda iyo Sharciga Isgaarsiinta Qaranka.4.In wax-ka-beddel kasta oo lagu sameeyo xeer-nidaamiye uu ansixiyey Guddiga Hay’adda uu u baahan yahay ogolaanshaha Guddiga Hay’adda si loo ilaaliyo nidaamka isla-xisaabtanka.5.In qiimayaasha iyo muddada ku qoran Nidaamka Mideysan ee Rukhsadaha aan lagala tashan Wasaaradda Boostada iyo Isgaarsiinta iyo Wasaaradda Maaliyadda, sida ku xusan Qodobka 44-aad iyo 45-aad ee Sharciga Isgaarsiinta Qaranka.

GO’AANNO iyo TALO-SOOJEEDIN

Dhinacyadii ka qeybgalay shirka waxa ay Wasaaradda Boostada, Isgaarsiinta iyo Teknolojiyada u soo jeediyeen talooyinka iyo go,aanada soo socda:

1.In lagu dhaqmo shuruudaha rukhsadaha isgaarsiinta ee Guddiga Hay’adda (Board-ka) uu hore u ansixiyey 04/02/2019 kadib marka la dhamaytiro, inta dokomintigii beddeli lahaa laga ansixinayo.

2.Nidaamka Mideysan ee Rukhsadaha waa nidaam ballaaran oo shaqo badan ay geliyeen maamulka Hay’adda. Hase yeeshee, waxaa loo baahan yahay in la marsiiyo hannaanka dajinta xeer-nidaamiyeyaasha Hay’adda, isla markaana lagala tashado Shirkadaha Isgaarsiinta, Wasaaradaha isgaarsiinta iyo Maaliyadda.

3.In aan lagu dhaqmi karinin Shuruudaha cusub ee Rukhsadaha iyo Nidaamka Mideysan ee Rukhsadaha ee uu Maamulka Hay’adda soo saaray 31kii May 2020.

4.In Jadwalka Qiimayaasha Khidmaha iyo Rukhsadaha markii ay ka soo dhammaato Hay’adda in loo gudbiyo Wasaaradda Boostada, Isgaarsiinta iyo Teknolojiyada si loogala tashto Wasaaradda Maaliyada, iyadoo tixgelin la siinayo xaaladda adeeg-bixiyaha si waafaqsan qodobka 40(2) ee Sharciga Isgaarsiinta Qaranka.

Ugu dambeyntii ka-soo-qeybgalayaasha shirka waxa ay u mahadceliyeen Garyaqaanka Guud ee Qaranka oo ku daray shirka talooyin qiimo badan oo fududeeyey isfahmka iyo iftiiminta qodobada cabashadu ka timid.