Todobaadkan Barnaamijka Waxa uu ku Saabsan yahay Doorka ay warbaahintu ka ciyaari karto nabad-dhissida Soomaaliya
Barnamijka waxaa diyaarisay Radio Warsan iyo BBC Media Action waxaana maalgelisay Midowga Yurub (European Union).
Warqad uu Xildhibaan Abiib u qoray Ciidamada Xoogga Dalka, uuna ogeysiiyey safaaradaha ka hawlgala Soomaaliya ayaa sida hoose u qornayd:
Ujeeddo: Malaayiin La Xaday, Ciidan Gaajaysan – Xaqiiqda Naxdinta Leh ee Musuqmaasuqa Villa Somalia
Ciidanka Qaranka Soomaaliyeed ee Geesiga ah,
Waxaan idiin soo gudbinayaa warqadan anigoo aan u hadleynin sida siyaasi ama xildhibaan, balse sida muwaadin Soomaaliyeed oo arka xanuunkiina, naftiina u horeysaan, iyo daacadnimadiina waddaniyeed – xilli dalka aad u heellan tihiin uu marar badan la idin illaabo, idinkuna marna aad waajibkiina illaawin. Idinku waxaad tihiin laf-dhabarta Jamhuuriyadda Federaalka Soomaaliya. Waxaad tihiin gaashaan difaacaya karaamada iyo deeganka dhulkeenna. Idinkaa habeenkii aan seexan oo heeganka ah, cidlada ku sugan, iyo khatarta gudaha iyo dibadda idinka timaadda, halka kuwa isku sheega “hoggaan” ay ku noolyihiin qasriyo laga dhisay dhiiggiinna.
Waxaan si buuxda u leeyahay: Waan ka xumahay waxa idinku dhacay. Waan ka xumaaday sida la idinla dhaqmay. Waan caroodey xaq-darrooyinka la idinku hayo la idin abaalmariyey. Waxaad naga mudan tihiin sharaf, xuquuq, iyo taageero dhab ah – waxaanan idin ballanqaadayaa inaan u dagaallami doono si aad u heshaan xaqa aad u qalantaan.
Balse taa beddelkeeda, Guddoomiyaha Golaha Shacabka iyo Villa Somalia waxay magaca ciidanka ka dhigeen agab siyaasadeed, aalad borobagaando, iyo qasnada lacag lagu xado. Iyaga oo safarro ku mara adduunka oo raaxo leh kuna cuna malaayiin la xaday, waxay haddana xildhibaan kasta ka qaadayaan $500 afar bilood oo xiriir ah – iyagoo sheegaya inay idinku talo galeen lacagtan. Magaciina ayay isticmaalayaan, laakiin hal senti toona lama siiyo ciidanka. Xilli geesiyaasha Ciidanka Qaranka Soomaaliyeed maalin walba u dhimanayaan ammaanka iyo madax-bannaanida dalka, waxaynu aragnaa in hantida qaranka si ula kac ah loogu bixinayo danaha koox yar oo musuqmaasuqay siyaasadda dalka – halkii ay ahayd in lagu taageero ciidanka.
Ciidamadu waxay weli wajahaan mushaar aan joogto ahayn, agab xumo, iyo dayacaad ba’an – halka masuuliyiinta sare ee dowladda, oo uu ku jiro Guddoomiyaha Golaha Shacabka, Xoghayaha Joogtada ah, iyo Habdhhoraha Golaha, ay si joogto ah u ansixinayaan lacagaha la siiyo shirkado xiriir la leh iyaga, iyadoo aan lala xisaabtamin. Tusaale ahaan:
o Luqman Petroleum Co. Ltd waxaa la siiyaa $39,732.17 bishii;
o Daljir Trading and General Service waxaa la siiyaa $95,637.15 bishii;
o Mogadishu Guest House Restaurant waxaa la siiyaa $33,945.15 bishii;
o DEH Construction and Logistics Co. Ltd waxaa la siiyaa $48,189.60 bishii.
Kuwani ma ahan kharashaad hal mar ah lagu bixiyo – waa lacag si joogto ah u baxaysa oo loogu talagalay adeegyo aan muhiim ahayn, iyadoo baahiyaha Ciidanka Qaranka la iska indho tirayo.
Waxaa kasii daran kharashaadka raaxada iyo kuwa aan la fahmi karin ee ku baxa Madaxtooyada iyo R/Wasaaraha, sida:
o $246,859.00 safar laba maalmood ah oo uu sameeyey Madaxweynaha;
o $415,000.00 safar afar maalmood ah oo New York loo aaday;
o $902,557.70 oo la siiyey SADECH Builders Logistic Consultancy Co, iyadoo aan la sheegin sababta;
o $189,455.00 oo lagu kharash gareeyey casho uu Villa Somalia u qabtay Madaxweynaha Jabuuti;
o $194,000.00 oo la siiyey Blink Logistic Services si ay “u hagaajiyaan” gaadhiga Madaxweynaha;
o $194,983.43 oo lagu hagaajiyey xafiiska Ra’iisul Wasaaraha;
o $150,000.00 safar 30-daqiiqo ah oo Ra’iisul Wasaaruhu ku tegay Adan Yabaal isagoo diyaaradda qumaatiga u kireystay;
o $217,255.75 oo la siiyey Eagle Trading and General Service adeeg “dayactir” ah oo aan faahfaahin lahayn.
Tani waa muujinta awood lagu xadgudbay iyo lunsiga hantida dadweynaha – iyadoo lagu sameynayo shacabka ay matalayaan. Malaayiin dollar ayaa ku luma raaxo, la-talin been ah, iyo adeegyo gaar ah, halka ciidamada – difaacayaasha Jamhuuriyadda Federaalka – aysan heysan xitaa mushaar ku filan inay qoyskooda quudiyaan ama hoy ku filan.
Dowladdu halkii ay ku maalgelin lahayd xoogga, daryeelka, iyo dhiirrigelinta ciidanka, waxay ku maalgelinaysaa raaxadeeda, sumcad been ah, iyo siyaasaddeeda cabsida leh. Tani ma ahan oo kaliya maamul xumo, waa khiyaano qaran iyo jebin lagu sameeyey kalsoonidii dadweynaha. Runta dhabtaa waxay tahay: adigoo oo gaajaysan waxa sababt u ah iyagoo xaday lacagtii la siin lahaa ciidamada.
Waxaan la soconaa malaayiin doollar oo ay siiyaan daneeyayaasha caalamka, deeq-bixiyeyaasha, iyo canshuur-bixiyeyaasha – in ay lacagtaas geliyaan account qarsoodiya oo ku yaal Turkiga, Kenya, Imaaraadka, Jabuuti, iyo dalal kale ay ku shubtaan. Waxay ku been abuurtaan kharashaad: safarro, dayactir, shidaal, tababarro, shirar aan dhammaanayn. Iyadoo la yiri lacag uma hayno si mushaar sax ah loo siiyo ciidanka.
Hadda, musuqmaasuqan ba’an awgii, dowladda Mareykanka waxay joojisay maalgelinta ciidanka Soomaaliya. Ka fikir tan. Waddankii ugu muhiimsanaa ee na taageeri jiray ma aaminayo dowladda hadda jirta inay mushaarka ciidankeeda siiso. Sababtoo ah lacagtu waa la xadaa. Sababtoo ah waa danbi. Sababtoo ah Villa Somalia waa goob dambiyo dhaqaale oo qarsoodi ah. Waxaayna ka dhigayaan kuwa runta sheega “cadawga ciidanka”? Waxaan kuu sheegayaa cidda cadawga ah: waa kuwa wax xada, oo haddana ku sheegta inay ku taageeraan.
Waxaa kasii daran – waana khiyaano aan la cafin karin – waa dhaqan xumada Wasiirka Gaashaandhigga ee hadda jooga. Halkii uu difaaci lahaa midnimada, dhexdhexaadnimada, iyo sharafka ciidanka, wuxuu noqday afhayeen Villa Somalia oo u adeega danahooda siyaasadeed. Wuxuu hanjabayaa in la cayrin doono askari kasta oo ilaaliya ammaanka hoggaamiyaasha mucaaradka. Goorma ayay noqotay in ilaalinta muwaadiniinta Soomaaliyeed – iyadoon loo eegeyn xisbiga ay taageeraan – noqoto khiyaano qaran? Ma hilmaamay in ciidankaan uu hadda handadayo ay ahaayeen kuwii isaga difaacayay markii uu isagu mucaaradka ahaa? Xagee ku dambeysay damiirkiisii?
Nasiib darrana, waxaa la idiin dhigay Wasiirkii ugu liitay ee abid soo maro Wasaaradda Gaashaandhigga – qof aan lahayn xirfad, aragti, iyo waddaniyad – balse leh hal ujeedo oo ah inuu xilka ku sii nagaado 10 bilood kale si uu idinka xadho lacagtiina. Isagu ma daneeyo dharkiina, caafimaadkiina, carruurtiina, ama mustaqbalkiina. Waxa uu daneeyo waa inuu ka mid ahaado golaha wasiirrada iyo inuu ka helo wax ka xadashada Villa Somalia. Shahaado keliya oo uu haysto waa daacadnimo uu u hayo tuugta. Hadaf keliya oo uu leeyahay waa inuu ku sii noolaado siyaasada – xitaa haddii ay ka dhigan tahay inuu burburiyo hay’addii uu ku dhaartay inuu ilaaliyo.
Haddii uu lahaa wax damiir ah, wuxuu ku bilaabi lahaa in uu eryo shirkadaha musuqmaasuqa lagu doortay ee Villa Somalia ay ka dhigteen qasnada lacag lagu lunsado – afar shirkadood oo qaata $400,000 bishiiba si ay u siiyaan raashin aan askarta gaadhin. Waxay noqdeen warshad xatooyo joogto ah.
Anigu ma aamusi doono. Waxaan diyaarinayaa mooshin qaran oo laga keeni doono Golaha Shacabka si:
o Mushaharkiina loo gaarsiiyo ugu yaraan $1,000 bishii.
o Carruurtiina loo siiyo waxbarasho bilaash ah.
o Idinka iyo qoysaskiina loo dammaanad qaado daryeel caafimaad buuxa.
o 50% laga gooyo miisaaniyadda been abuurka ah ee dowladda: safarro, raaxo, la-taliye been ah, iyo hoteello.
o La joojiyo dhammaan qandaraasyada been abuurka ah ee cunaya raashinka ciidanka.
Taas kaliya waxay soo celin kartaa in ka badan $350 milyan oo doollar – taas oo ku filan in lagu siiyo nolol sharaf leh, halkii aad maanta ka heshaan hadhaaga amba hambada.
Idinku mar dambe aalad siyaasadeed ma noqon doontaan. Waxaa la idiin aqoonsan doonaa geesiyaal qaran.
Mar dambe kuma quudhi doontaan hadhaaga amba hambada. Waxaa la idiin siin doonaa karaamo.
Mar dambe la idiin iloobi maayo. Waxaa la idiin dhigi doonaa aasaaska dib u dhiska Soomaaliya.
Walaalayaal ciidanka Soomaaliyeedow: waan idin arkayaa. Waan idin rumeysanahay. Waxaan idiin ballan qaadayaa: inta aan kursigan ku fadhiyo, ma nasanayo ilaa la ixtiraamo nafta aad noo hureysaan, la soo celiyo sharaftiinna, lana sugo mustaqbalkiinna.
Adinku Soomaaliya ayaad u adeegtaan. Soomaaliya waa inay idiin adeegi doontaa.
Alle ha idin ilaaliyo, qoysaskiinnana ha barakeeyo, hana lacnado kuwa idinka xada iyagoo sheeganaya hoggaanimo.
Dr. Abdillahi Hashi Abib – BA, MA, MASc, Ph.D
Member of Foreign Affairs Committee Federal Republic of Somalia the House of People
Mogadishu, Somalia
Guddoomiye kuxigeenka labaad ee Golaha Shacabka ee Baarlamaanka Jamhuuriyadda Federaalka Soomaaliya Mudane Cabdullaahi Cumar Abshirow oo isaga iyo wafdi uu hogaaminayo ay safar shaqo ku joogaan wadanka Tanzania caasimadiisa Dar es Salaam ayaa booqday xarunta safaaradda Jamhuuriyadda Federaalka Soomaaliya ee Magaaladda Dar es Salaam, taas oo hada dhismaheedu meel gabogabo ah marayo.
Guddoomiye ku xigeenka labaad ee Golaha Shacabka Baarlamaanka Jamhuuriyadda Federaalka Soomaaliya oo uu xarunta safaaradda ku soo dhoweeyay safiirka Jamhuuriyadda Federaalka Soomaaliya u fadhiya wadanka Tanzania Danjire Ilyees Cali Xasan ayaa sheegay in safaaradda Soomaaliyeed ee Tanzania ay ka mid noqon doonto xarumaha ugu quruxda badan ee safaaradaha dalkeennu ku leeyahay caalamka.
Guddoomiye kuxigeenka ayaa Tanzania uga qeyb galay Shirweynihii 19-aad Guddoomiyeyaasha Baarlamaannada wadamada xubnaha ka ah Urur Goboleedka Iskaashiga Dhaqaalaha Bariga Afrika oo socday labo maalmood.
Muqdisho – Ra’iisul Wasaaraha Xukuumadda Federaalka Soomaaliya, Mudane Xamsa Cabdi Barre, ayaa maanta xafiiskiisa ku qaabilay Danjiraha Boqortooyada Sucuudi Carabiya u fadhiya Soomaaliya, Mudane Axmed Bin Maxamed Al-Mawlid, iyagoo si qoto dheer uga wadahadlay xoojinta xiriirka walaaltinimo iyo iskaashiga istiraatiijiga ah ee u dhexeeya labada dal.
Ra’iisul Wasaaraha ayaa uga mahadceliyay Boqortooyada Sucuudiga taageerada joogtada ah ee ay siiso dowladda iyo shacabka Soomaaliyeed, gaar ahaan dhinacyada gargaarka bani’aadannimo, amniga, maalgashiga, iyo horumarinta kaabayaasha dhaqaalaha.
Dhankiisa, Danjire Axmed Al-Mawlid ayaa xaqiijiyay in Sucuudigu weli garab taagan yahay Soomaaliya, isla markaana uu diyaar u yahay inuu sii xoojiyo kaalmada uu ku bixinayo dib-u-dhiska dalka. Waxa uu sidoo kale xusay in Boqortooyadu ka go’an tahay la shaqeynta dowladda Soomaaliya si loo xoojiyo dadaallada lagu sifeynayo kooxaha Argagaxisadda ah, loona suurtageliyo horumar ballaaran oo dadka Soomaaliyeed gaaraan.
Kulankan ayaa qeyb ka ah dadaallada joogtada ah ee labada dal ku xoojinayaan iskaashiga laba geesoodka ah, iyada oo la filayo in iskaashigaasi uu gaaro heerar cusub oo waxtar leh.
Guddiga Joogtada ee Golaha Shacabka Baarlamaanka Federaalka Soomaaliya ayaa maanta ku yeeshay kulankoodii toddobaadlaha ahaa xarunta Guddoonka iyo Guddiyada ee Villa Hargeysa.
Shirka ayaa waxaa guddoomiyay Guddoomiyaha Golaha Shacabka, Sheekh Aadan Maxamed Nuur (Madoobe), waxaana wehelinayay Guddoomiye Ku-xigeenka Koowaad Sacdiya Yaasiin Xaaji Samatar iyo Guddoomiye Ku-xigeenka Labaad Cabdullaahi Cumar Abshirow.
Guddoomiyaha Golaha Shacabka ayaa furitaanka kulanka uga warbixiyay xubnaha Guddiga Joogtada ah shaqooyinka mudnaanta u leh Golaha inta ka harsan kalfadhiga lixaad. Sidoo kale, guddoomiyeyaasha guddiyada joogtada ah ayaa bixiyay warbixinno la xiriira shuruucda horyaalla iyo habraacyada howleed ee harsan.
Intii uu socday kulanka, Guddiga Joogtada ah ayaa sameeyay ajandeyn iyo jadwaleyn rasmi ah oo ku aaddan kulamada Golaha ee toddobaadka soo socda, si loo dardargeliyo hawlaha horyaalla.
Ugu dambeyn, Guddoomiye Sheekh Aadan Madoobe ayaa xidhitaanka kulanka kula dardaarmay xubnaha Guddiga Joogtada ah in ay sii laba-jibaaraan dadaallada lagu horumarinayo shaqada Golaha Shacabka, si Baarlamaanku uga gudbo wajiyada muhiimka ah ee horyaalla dalka.
Caasimadda Soomaaliya ee Muqdisho ayaa maanta marti gelin doonta qaar kamid ah siyaasiyiinta ugu saameynta badan dalka, kuwaasoo horey u soo qabtay xilal sare sida Ra’iisul Wasaaraha iyo Guddoomiyaha Baarlamaanka Federaalka.
Madaxdan oo si weyn u dhaliilsan siyaasadda dowladda uu hoggaamiyo Madaxweyne Xasan Sheekh Maxamuud, ayaa hadda u muuqda kuwo mideynaya mowqifkooda, iyagoo ku howlan abaabul siyaasadeed oo ballaaran.
Ra’iisul Wasaareyaashii hore Xasan Cali Khayre iyo Cumar Cabdirashiid Cali Sharma’arke ayaa lagu wadaa in ay maanta soo gaaraan Muqdisho, halkaas oo ay kulamo la yeelan doonaan siyaasiyiin kale oo mucaarad ah. Ilo lagu kalsoon yahay ayaa sheegaya in kulamadan ay sal u yihiin dadaal lagu doonayo in lagu mideeyo aragtiyaha siyaasadeed ee dhinacyada mucaaradka.
Sidoo kale, toddobaadka soo socda waxaa Muqdisho kusoo wajahan siyaasiyiin magac ku leh siyaasadda dalka, sida Ra’iisul Wasaareyaashii hore Cabdi Faarax Shirdoon (Saacid), Cabdiweli Sheekh Axmed iyo Maxamed Xuseen Rooble. Waxaa sidoo kale la filayaa imaanshaha Guddoomiyeyaashii hore ee Baarlamaanka, Shariif Xasan Sheekh Aadan iyo Maxamed Mursal Sheekh Cabdiraxmaan, kuwaas oo door muuqda ka soo qaatay siyaasadda dalka sanadihii u dambeeyay.
Xogaha la helayo ayaa muujinaya in siyaasiyiintan mucaaradka ah ay wadaan qorshe cusub oo lagu mideynayo mowqifkooda, si loo kordhiyo cadaadiska ay saareen dowladda hadda jirta. Ujeeddada ugu weyn ayaa lagu sheegay inay tahay in dalka laga hirgeliyo hannaan siyaasadeed oo xasilloon, lagana fogaado fowdo siyaasadeed.
Tallaabadan ayaa ku soo beegmeysa xilli ay dalka ka jiraan xaalado siyaasadeed oo cakiran, iyadoo shirar diblomaasiyadeed iyo abaabulo siyaasadeed ay si xowli ah uga socdaan gudaha iyo dibedda dalka.
Hay’adda Socdaalka iyo Jinsiyadda (HSJ) ayaa maanta xarunta saddexaad ee baasaboor bixinta ka furtay Degmada Dayniile ee Gobolka Banaadir.
Munaasabadda furitaanka xarunta Saddexaad ayaa waxaa kasoo qeyb galay, Wasiirka Amniga Gudaha ee XFS, Md Abdullahi Fartaag, Xildhibaano ka tirsan labada Aqal ee BJFS, Agaasimayaal iyo saraakiil ka socday HSJ iyo Guddoomiyeyaasha Degmooyinka Deyniile & Hawl-Wadaag iyo qeybaha kala duwan ee Bulshada.
Agaasimaha Guud ee HSJ Mudane Mustafe Sheekh Cali Dhuxulow oo munaasabadda ka hadlay ayaa sheegay in xaruntan cusub ay qeyb ka tahay dadaalka ay hay’addu ugu jirto ballaarinta adeegyada baasaboorka si ay muwaadiniinta Soomaaliyeed u helaan adeeg u dhow oo deg deg ah isla markaana culeyska looga yareeyo xarumaha kale ee Magaalada Muqdisho.
Wasiirka Amniga Gudaha Mudane Cabdullaahi Sheekh Ismaaciil (Fartaag), ayaa dhanka kale sheegay in xaruntan cusub ee Dayniile ay astaan u tahay adeeg daadajinta iyo dowladnimo horumarsan, isagoo dhanka kalena bogaadiyay madaxda & Saraakiisha HSJ iyo sida ay uga go’an tahay baahinta adeegyada muhiimka ah ee socdaalka iyo jinsiyadda.
Ciidamada Xoogga Dalka Soomaaliyeed iyo kuwa deegaanka ee ka howlgala gobolka Hiiraan ayaa maanta weerar ballaaran ku qaaday fariisimo ay kooxda Al-Shabaab ku lahaayeen dhulka howdka ah ee ku yaalla xuduudda u dhaxaysa gobollada Hiiraan iyo Shabeellaha Dhexe.
Weerarkan oo si gaar ah uga dhacay deegaanka Ceel-Hareeri ayaa lagu beegsaday saldhigyo istaraatiiji ah oo ay Al-Shabaab ku leeyihiin goob godad ah oo la rumeysan yahay in ay ku sugnaayeen xubno sare oo ka tirsan kooxda. Wararka hordhaca ah ayaa sheegaya in dagaalku yahay mid aad u culus, islamarkaana weli socda.
Inkasta oo aan la helin tirakoob rasmi ah oo ku saabsan khasaaraha ka dhashay dagaalka, haddana ilo deegaanka ah ayaa sheegaya in labada dhinac ay soo gaareen khasaare kala duwan.
Weerarkan ayaa imanaya kadib howlgallo isdaba joog ah oo maalmihii lasoo dhaafay ay ciidamada ka wadeen xadka ay wadaagaan Hiiraan iyo Shabeellaha Dhexe. Howlgalladaasi hore ayaa sababay in la dilo tiro badan oo ka tirsan Al-Shabaab, iyadoo sidoo kalena ay ku dhinteen saraakiil ciidan.
Mas’uuliyiin ay ka mid yihiin Agaasimaha Guud ee Hay’adda Nabad Sugidda iyo Sirdoonka Qaranka (NISA), xildhibaano kasoo jeeda gobolka Hiiraan, iyo madax kale ayaa ku sugan furimaha hore si ay u kormeeraan una dardargeliyaan gulufka dagaal ee socda.
Weerarka maanta dhacay ayaa qeyb ka ah dadaallada joogtada ah ee lagu doonayo in Al-Shabaab looga saaro deegaannada ay wali gacanta ku hayaan. Ciidamada dowladda iyo kuwa deegaanka ayaa saddexdii maalmood ee lasoo dhaafay galay dagaallo adag oo ay ku guuleysteen in ay dib uga qabsadaan goobo muhiim ah oo kooxdaasi horey u maamulaysay.
Magaaladda Muqdisho waxa ku da’ay roobab xooggan oo sameyn ballaaran ku yeeshay isku socodka dadka iyo gaadiidka. Roobkan oo da’ay saacadihii la soo dhaafay ayaa sababay burburka waddooyinmuhiim ah,waxa dumay guryo, sidoo kale waxa la sheegay in ay jirto. Dadka qaar ayaa ku xayirmay jidadka halka kuwa kalena ay ku khasbanaadeen in ay ku dhex lugeeyaan daadadka waddooyinka socday.
Qar ka mid ah dadka ku nool Muqdisho ayaan weyddiinay sameeeynta uu ku yeeshay roobku iyo burburka waddooyinku. Maxamed Jamac oo ka mid ah bajaajlayda aya ka hadlay caqabadaaha ka heysto laamiyadda, daadka iyo jidadka uu roobku gooyay.
“Maanta dhiiqo meel an ka maarno ayaan weyney, magaaladda meel kasta biiyo ayaa socda, haddana sidaas oo ay tahay canshuur ayaa nalaga qadaa habeen iyo maalin. Guryaha, dukaanada, bajajka dhammaan cashuur ayaa laga wadda qaada, haddana roobku marka uu da’o ma la shaqaysan karo.”
“Dadka jiidadka sameeynaaya ee qandarasaadda lagu siiyoo lama xakameeyo” Maxamed Jamac ayaa sidaas yiri.
Mahdi oo ka mid ah shacabka magaladaa Muqdisho ayaa ka hadlay lacagta bajajta lagu raacayo in qaalli noqotay..
“Waddoyiinka maanta aad ban ugu dhibaatoonay, waddoyinka qaar way xiirnayeen iyo kuwo ay goyeen biyuhu ayaa ay isugu jireen. Saaka babuur caasi ah oo wadday hilib ayaa ku dhacay jidka Soobe, sidoo kale lacagtii bajaajta lagu raacayay qaalli ayaa ay noqotay, meeshii halka doolar lagu tagaayey saddex ayaa ay ku dhahayaan. Dawladdu cashuur ayaa ay naga qaada, haddana uma jeedno wax lagu qabto.”
Todobaadkan Barnaamijka Waxa uu ku Saabsan yahay kaalinta Wadajirka iyo Iskashigu ka qaato horumarka Bulshada
Barnamijka waxaa diyaarisay Radio Warsan iyo BBC Media Action waxaan maalgelisay Midowga Yurub (European Union).