Warsan Radio

Alle ha u naxariistee, Taliyeyaasha Guutooyinka 8-aad iyo 9-aad ee Qeybta 60-aad, Yoonis Aadan iyo Cali Cadow, ayaa ku geeriyooday iska hor-imaad ka dhacay duleedka magaalada Baydhabo.

Wararka ayaa sheegaya in iska hor-imaadka uu dhexmaray ciidamo taageersan madaxweynihii hore ee Koonfur Galbeed, Abdiasis Hassan Mohamed Laftagareen, iyo ciidamo kale oo taageersan maamulka cusub ee ay dowladda federaalka ka dhisayso magaalada Baydhabo.

Iska hor-imaadka ayaa la sheegay inuu ka dhashay xiisado siyaasadeed iyo dhaq-dhaqaaqyo ciidan oo maalmihii u dambeeyay ka jiray duleedka magaalada, iyadoo khasaaro dhimasho iyo dhaawac leh uu ka dhashay dagaalkaasi.

Ilaa hadda ma jiro war rasmi ah oo kasoo baxay maamulka Koonfur Galbeed ama dowladda federaalka oo faahfaahin ka bixiyay dhacdada iyo khasaaraha ka dhashay.

Doorashooyinkii qof iyo codka ahaa ee ka dhacay Dowlad Goboleedka Koonfur Galbeed Soomaaliya ayaa lagu dhawaaqay natiijadooda rasmiga ah, iyadoo ururka JSP uu noqday ururka ugu kuraasta badan Golaha Wakiillada kadib markii uu helay 51 kursi.

Natiijada doorashada ayaa muujisay in ururka NPU uu galay kaalinta labaad isagoo helay 14 kursi, halka ururka Karaama uu ku guuleystay 11 kursi.

Sidoo kale, ururka SINCAD ayaa helay 6 kursi, Towfiiq 4 kursi, halka Tiir uu helay 3 kursi.

Dhanka kale, ururrada Waaberi, Madalsan, Muwaadiniinta Soomaaliyeed, SAAB, Dhalinyarada Talo Qaran iyo Ramaas ayaa mid kasta uu helay hal kursi.

Natiijadan ayaa ka dhigeysa JSP ururka ugu awoodda badan Golaha Wakiillada Koonfur Galbeed, kadib doorashadii qof iyo codka ahayd ee dhawaan ka dhacday deegaanada kgs.

Ururrada Siyaasadeed ee ka qeybgalaya doorashada Koonfur Galbeed Soomaaliya ayaa walaac xooggan ka muujiyay habka ay u socoto shaacinta natiijada doorashada ee ay wadaan guddiga doorashooyinka.

Musharraxa Xisbiga SINCAD Cabdifataax Ibraahim Maxamed Geesey, musharraxa Xisbiga Ramaas Ilyaas Cali Nuur Xasan, iyo musharraxa Xisbiga Talo Qaran Xasan Nation ayaa sheegay in dib u dhaca ku yimid ku dhawaaqista natiijada uu sare u qaaday shakiga laga qabo hannaanka doorashada.

Musharraxiinta ayaa tilmaamay in waqtigii loogu talagalay shaacinta natiijada ay dhaaftay, iyagoo xusay in xisbi walba uu ogyahay tirada codadka uu helay.

Waxay sidoo kale caddeeyeen in aysan aqbali doonin natiijo aysan u arkin mid waafaqsan codadka dhabta ah ee la dhiibtay.

Ururradan siyaasadeed ayaa guddiga doorashooyinka ugu baaqay inay si hufan, cadaalad ah, isla markaana degdeg ah u shaaciyaan natiijada doorashada si loo ilaaliyo kalsoonida geeddi-socodka doorashooyinka

Guddiga Madaxa-Bannaan ee Doorashooyinka Qaranka iyo Soohdimaha ayaa si rasmi ah ugu dhawaaqay in maanta la shaacin doono natiijada Doorashooyinka Isku Sidkan ee Dowlad Goboleedka Koonfur Galbeed Soomaaliya, kadib maalmo ay socdeen tirinta iyo hubinta codadka doorashada.

Ku dhawaaqista natiijada ayaa ka dhici doonta magaalada Baydhabo, iyadoo shacabka Soomaaliyeed, gaar ahaan bulshada Koonfur Galbeed, ay si weyn indhaha ugu hayaan natiijada doorashadan oo ahayd mid si weyn loo hadal hayay.

Doorashadan ayaa loo arkaa mid taariikhi ah, maadaama ay qeyb ka tahay hirgelinta nidaamka doorashooyinka qof iyo codka ah, waxaana lagu tartamay goleyaasha deegaanka iyo baarlamaanka dowlad goboleedka.

Warbaahinta gudaha iyo dibadda ayaa si toos ah ula socota munaasabadda lagu shaacinayo natiijada, iyadoo la filayo in guddigu faahfaahin dheeraad ah ka bixiyo habka doorashada, tirada codadka iyo xisbiyada ama musharixiinta guuleystay.

Dowladda Kuwait ayaa qaadday tallaabo ka dhan ah Dad badan oo Xukuumaddu dib ugala laabatay dhalashadeeda kuwaas oo isugu jira Siyaasiyiin, Culimo, Fannaaniin, Ciyaartoy & qaybaha kala duwan ee Bulshada Dalkaas.

Bilhii lasoo dhaafay ee sannadkaan 2026 waxaa la sheegay in Dowladda Kuwait ay dhalashada dib ugala laabatay Dad kor u dhaafaya 70,00 waxaana ay la kulmeen Dadkaas dhibaatooyin xooggan sida ay waayeen lacagihii ay heli jireen, koontooyinkooda oo la xiray & in aysan safri Karin.

April oo keliya waxa ay Dowladdu dhalashada dib ugala laabatay dad gaaraya 1,266 waana arrin guux badan ka dhex dhalisay Dalkaas maadaama laga eryayo shaqooyinka Dowladda, sidoo kalena aanay lacagtiisa kala bixi Karin Bangiyada & In ubadkiisa laga eryayo Waxbarashada.

Tallaabadaan waa mid gilgishay guud ahaan Dalka Kuwait, waxaa cabsi xooggan ay soo wajahday Dadkaas haysta dhalashada oo waqti weliba suuragal ay tahay in laga qaadi karo kana istaaggi karaan xuquuqaadkii uu heli jiray.

Dadka la yaabay tallaabadaas waxaa kamid ah goolhayihii hore ee xulka Kuwait, Ahmed Al-Tarabulsi oo nin xushmad weyn ku dhex leh bulshadiisa ah, sidoo kale waa Sheekh xitaa munaasabadaha dalkaas ka dhaca qur’aanka ka aqriya.

Arrimaha kale ee layaabka leh waa in dadkaas dib looga celiyay dhalashada Kuwait in ay ku jiraan kuwo Dalkaas oo keliya dhalasho ka haystay kuwaas oo haatan noqday Dad aanay lahayn Dal, Xuquuq iyo Aqoonsi waddan.

Hay’adaha u dooda Xuquuqda Aadanaha ayaa walaac ka muujiyay xeerarka iyo Dastuurka Dalkaas oo ay jebisay Dowladda Kuwait, waxaa socda sidii loo abaabuli lahaa doodo culus oo ka dhan ah arrintaas laguna dalbanayo in dib loogu celiyo dhalashadooda Dadkaas.

Madaxweynaha Maraykanka, Donald Trump oo dhibsaday Warbixinnada ay soo bandhigayaan Warbaahinta aan taageersanayn Siyaasadda Xukuumaddiisa ayaa eedayn kala dul dhacay kaddib markii ay sheegeen in awoodda Militari ee Iiraan ay weli jirto.

Donald Trump ayaa weerar toos ah ku qaaday Warbaahintaas ka janjeerta ee soo bandhigaysa xogaha ka dhanka ah oo suuragalin kara inay kacaan Dadka Maraykanka maadaama warbixinnadii uu horay uga siiyay Arrimaha Iiraan ay kahor imaanayaan.

Waxa uu wax aan loo dulqaadan Karin ku tilmaamay Warbaahinta uu ku tilmaamay in ay buunbuurinayaan Iiraan kana soo horjeedaan howlgallada dalkiisa, Trump ayaa si caro ku dheehan tahay uga falceliyay hadalladaas.

Wargayska New York Times ayaa Warbixin uu baahiyay ku sheegay in qiimaynta sirdoonka Maraykanka ay muujinayso inay Iiraan weli haysato qayb weyn oo kamid ah Awoodda Militariga, waa hadalka uu sida tooska ah u dhibsaday Donald Trump.

Warbixinta Wargayska ee lagu dhisay Xog-baaristiisa dhinaca Sirdoonka waxaa lagu ogaaday in 30 kamid ah 33da Saldhig ee Iiraan ay dhisan yihiin kuwaas oo ku teedsan Marin biyoodka Hormuz, waxaana intaas dheer Xarumaha Dhulka iyo Gantaallada culus ee diyaarsan.

Wakiillo katirsan Beesha Caalamka ayaa maanta lagu wadaa in ay la kulmaan mas’uuliyiin katirsan Dowladda Federaalka iyo xubnaha Mucaaradka si loo dhagaysto doodaha Siyaasadeed ee ka dhex jira labada dhinac ee la xiriira Doorashada & Mustaqbalka Dalka.

Muqdisho waxaa shalay soo gaaray Madaxweynaha Dowlad-Goboleedka Puntland, Siciid Cabdullaahi Deni oo Caasimadda u yimid martiqaadka Beesha Caalamka si loo dhagaysto tabashadiisa siyaasadeed iyo aragtiida doorashada Dalka.

Saacadihii lasoo dhaafay waxaa Magaalada Muqdisho ku kulmay xubno katirsan Mucaaradka oo doonaya in ay dalka ka qabsoonto Doorasho dadban oo degdeg ah iyaga oo ku doodaya in waqtiga xilhaynta Madaxda Dowladda uu sii dhammaanayo.

Dowladda Federaalka Soomaaliya oo sal ka dhiganaysa Dastuurka cusub ayaa ku doodaysa in muddo sannad ah uu ka dhiman yahay muddo xileedka Dowladda, sidoo kalena ay qabanayso Doorasho qof iyo cod ah oo Muqdisho & Koofur Galbeed ka qabsoomeen.

Kala aragti fogaantaasi waxa ay sababtay in labada dhinac waa Dowladda Federaalka iyo Mucaaradka ay kala istaagaan labo daraf, Wakiillada Beesha Caalamka ayaa dhagaysanaya doodahooda inkasta oo ay horay u soo dhaweeyeen doorashadii dadweyne ee dhacay.

Haddaba, Beesha Caalamka ma waxa ay taageeri doontaa in Dalka ay ka dhacdo Doorasho Dadban mise tan Dadweyne?

Maxaase dhici kara haddii Wakiillada Dalalka kala duwan metalaya ee Muqdisho jooga ay dhinac u tuuraan muranka siyaasadeed ee

Madaxweynaha Maraykanka, Donald Trump ayaa lagu wadaa in uu la kulmo dhiggiisa Shiinaha, Xi Jinping iyaga oo kawada hadlaya culayska labada dhinac saaran, mid weliba in uu qaato door ah fududaynta xal u helista culayskaas iyo tartanka dhinaca Dhaqaalaha ah.

Donald Trump ayaa doonaya in uu dhiggiisa Shiinaha la wadaagayo culayska uu kala kulmayo dagaalka Iiraan maadaama Washington ay ku xaglinayso in Beijing ay garab taagan tahay dhiggeeda Tehran & sidii ay kaalin muuqata uga qaadan lahayd dedaallada Socda.

Madaxweynaha Shiinaha, Xi Jinping ayaa qudhiisa waxa uu dhiggiisa Maraykanka, Donald Trump kala hadlayaa in ay Washington joojiso culayska ay kasoo saarayso dhinaca Taiwan oo mas’uuliyiin katirsan Maraykanka ay xitaa booqdeen.

Labadaan Dal waa Maraykanka iyo Shiinaha waxa ay xubno joogto ah ka yihiin Golaha Ammaanka ee Qaramada Midoobay, waxaa ka dhaxeeya loolan dhinaca Siyaasadda, Miliariga, Ganacsiga iyo dhinacyo kale, madaxdooda ayaa marar badan kawada hadlay joojinta culayska dhinac weliba uu dhanka kale kala kulmayo.

Dowladda Qadar ayaa si adag u cambaaraysay afduubka markab shidaal oo laga qabsaday biyaha dalka Yemen, kaas oo ay saarnaayeen badmareeno u dhashay dalka Masar, laguna haysto xeebaha Soomaaliya.

Wasaaradda Arrimaha Dibadda ee Qadar ayaa bayaan ay soo saartay ku sheegtay in markabkaas loola baxsaday biyaha Soomaaliya, gaar ahaan aagga maamulka Puntland.

Qadar ayaa falkan ku tilmaantay mid ka horimanaya shuruucda caalamiga ah iyo khatar weyn oo soo wajahda badqabka marinnada badeedka iyo ganacsiga caalamiga ah.

Dowladda Qadar waxay muujisay inay si buuxda u garab taagan tahay dalka Masar iyo qoysaska badmareenada la afduubay, iyadoo ku baaqday in la dammaanad qaado badqabka shaqaalaha markabka iyo in si degdeg ah xorriyadooda loogu soo celiyo.

Dowladda Masar ayaa Isniintii xaqiijisay in markab shidaal oo ay saaran yihiin siddeed badmareen oo u dhashay dalkeeda laga afduubay xeebaha Yemen, lana geeyay gudaha Soomaaliya.

Wararka ayaa intaas ku daraya in markabkan ay burcad-badeed qabsadeen 2-dii bishan May xilli uu marayay xeebaha gobolka Shabwa ee koonfurta dalka Yemen, waxaana guud ahaan saarnaa 12 badmareen oo isugu jira dad u dhashay Masar iyo Hindiya.

Madaxweynaha Dowladda Federaalka Soomaaliya, Xasan Sheekh Maxamuud ayaa lagu wadaa in uu maanta la kulmo dhiggiisa Jamhuuriyadda Jabuuti, Ismaaciil Cumar Geelle si ay uga wadahadladaan Xaaladda labada iyo xoojinta iskaashiga ka dhaxeeya.

Madaxweyne Xasan Sheekh Maxamuud oo Jabuuti u tagay ka qaybgalka Caleemosaarka Madaxweynaha dib loo doortay ee Ismaaciil Cumar Geelle ayaa kamid ah madaxda kulamada gaargaarka ah la qaadanaysa hoggaamiyaha waqtiga dheer maamulaya dalkaas.

Wafdiga Madaxweyne Xasan Sheekh Maxamuud ayaa kulamo gaargaar ah oo hordhac ah la qaatay mas’uuliyiin kala duwan oo uu kamid yahay Ra’iisul Wasaaraha Jamhuuriyadda Jabuuti, Cabdulqaadir Kaamil Maxamed iyo xubno kale.

Madaxda sare ee Dowladda Federaalka Soomaaliya ayaa horay u bogaadisay guusha Madaxweyne Ismaaciil Cumar Geelle uu ka gaaray Doorashadii ka dhacday Jamhuuriyadda Jabuuti 10kii April ee sannadkaan 2026.

La soco wixii kasoo kordha