Dadka isticamaala baraha bulshada shirkadda Meta, sida Facebook, isla markaana lacagta ka sameeya ee ku nool dalka Kenya ayaa heli doona fursad ay gudaha dalkaas lacag uga sameyn karaan ciwaanadooda.
Shirkadda Meta ayaa maanta balanqaaday in bisha June ee soo socota ay si toos ah lacag uga samayn doonaan dadka ku nool Kenya waxyaabaha ay soo galiyaan baraha bulshada, sida qoraalada, sawirrada iyo muuqallada.
Tallaabadan ayaa timid kadib markii kulan wada xaajood ah ay yeesheen Madaxweynaha dalka William Ruto iyo shirkadda weyn ee Meta, tani waxay Kenya ka abuureysaa fursad weyn oo lacago looga samayn karo masraxa casriga ah ee internet-ka oo inta badan dadku wakhtigooda ku lumiyaan.
Madaxweynaha Arrimaha Adduunka ee Facebook Nick Clegg, ayaa ku dhawaaqay in wax abuurayaasha baraha bulshada ee Kenya ku nool ay kasoo baxeen shuruudaha ah in lacag laga samayn karo baraha Meta ee Facebook iyo Instagram.
Dowladda Kenya ayaa hadda u muuqata inay gaartay natiijada arrin ay muddo ku dadaaleysay, taas oo ah sidii dadka jooga gudaha dalkaas ay dhaqaale uga sameyn lahaayeen aaladaha shirkadda Meta oo Facebook ugu horeeyo.
Madaxwynaha Kenya ayaa soo dhaweeyay go’aanka shirkadda, isagoo ka codsaday maamulka Meta in habka lacag la bixista lagu daro M-Pesa oo ah tallaabo dhibyaraynaysa habka adeega lacagta qaadashada faa’iidooyinka laga sameeyo baraha bulshada ee shirkadda Meta.
Qofkii lacag ka samaynaya baraha bulshada ee Meta, waa in ugu yaraan 5,000 oo qof ay ku xiran tahay ciiwaankiisa, sidoo kale waxaa jira shuruudo kale oo qofka uga xiran inuu dhaqaale ka sameeyo ciwaankiisa, waxaana ugu muhiimsan daawashada.
Guud ahaan Qaaradda Afrika qofka jooga baraha bulshada ee shirkadda Meta kama sameyn karo wax dhaqaale, waxaana hadda soo baxay warkaan sheegaya in loo ogolaaday Kenya.
Dadka jooga Afrika oo Soomaalidu ugu horeyso ee lacaha la sameeya Facebook, waxay ciwaankooda u xawilaan Yurub ama America, maadaama aan gudaha qaaradaan laga ogolaan inuu ka furaado ciwaan lacag laga sameynayo.
