Gool dhaliyaha xulka qaranka France iyo kooxda Real Madrid ee Karim Benzema ayaa dagaal ugu jira sidii uu taam ugu noqon lahaa kulanka lugta hore ee Champions Leaque-ga kaas oo ay Real Madrid Turin kula ciyaari doonto kooxda Juventus.
Real Madrid iyo Juventus ayaa ku jira xaalado fiican kadib markii ay xalay guulo ay ku farxeen gaadheen. Juventus ayaa guul ay ka gaadhay Sampdoria ku xaqiijisatay hanshada hoyraalka Serie A-da oo ay xili ciyaareedkii afaraad oo xidhiidh ah ku guulaysatay. Halka Real Madrid ay guul qaali ah ka gaadhay Sevilla.
Real Madrid iyo Juventus ayaa kulanka lugta hore ciyaari doona talaadada kulankaas oo ka tirsan afar dhamaada Champions Leaque.Haddaba Benzema oo maanta oo axad ah tababarka ku qaatay xarunta tababarka Real Madrid Valdebebas complex ayaa doonaya inuu taam u noqdo kulanka Juventus.
Benzema ayaa tababarka la qaadanayay Casillas, Navas, Álvaro Arbeloa, Fabio Coentrão, Nacho, Asier Illarramendi, Gareth Bale, Lucas Silva iyo Jesé.Benzema ayuu dhaawaca uu la maqan yahay soo gaadhay April 14, markaas oo ay Real Madrid kulankii lugta hore ee Champions Leaque ay Calderon kula soo ciyaartay Atletico Madrid.
Benzema ayaa Real Madrid ka maqnaa shan kulan, waxaana booskiisa buuxiyay Javier Hernandez kaas oo intii uu shaxda Madrid ku bilawday wacdaro layaableh garoomada ka dhigay.
