Wafdi uu hoggaaminayo Madaxweynaha Dowlad goboleedka Koonfur Galbeed Cabdi Casiis Xasan Maxamed (laftagareen) ayaa waxaa ay gaareen Magaalada Dhuusamareeb ee gobolka Galgaduud, iyaga oo ka ambabaxay Magaalada Baydhabo ee Gobolka Baay.
Garoonka Diyaaradaha Ugaas Nuur ee Magaalada Dhuusamareeb ayaa waxaa Madaxweyne laftagareen kusoo dhaweeyay Madaxweynaha Galmudug Axmed Cabdi Kaariye ( Qoor Qoor) iyo Xubno kamid ah Golihiisa Wasiirada iyo qeybaha kala duwan ee Bulshada.
Madaxweynaha Dowlad goboleedka Koonfur Galbeed Cabdi Casiis Xasan Maxamed (laftagareen) ayaa safarkaan waxaa ay u tahay markii ugu horreysay uu tago Dhuusamareeb tan iyo markii la doortay,waxaana kasoo horeeyay Madaxweynaha Hir-Shabeelle Maxamed Cabdi Waare.
Ammanaka Magaalada Dhuusamareeb ayaa aad loo adkeeyay,waxaana saacadaha soo socda la filayaa in ay Magaalada Dhuusamareeb tagaan Madaxweynayaasha Puntland iyo Jubbaland si ay uga qeyb galaan Shirka Madaxda Dowlad Goboleedyada.
Dhanka kale Magaalada Dhuusamareeb ee caasimadda Dowlad Goboleedka Galmudug ayaa waxaa ka socda kulamo loogu diyaar garoobayo shirka gelinka dambe ee Maanta halkaasi uga furmaya Madaxda Dowlad Goboleedyada.
Madaxweynaha Maamulka Hir-Shabeelle Maxamed Cabdi waare ayaa Guriga Dhuusamareeb laag dejiyay waxaa ku booqday Wasiirkii hore ee arrimaha Gudaha Soomaaliya Cabdi Samad Macalin Maxamuud, waxaana ay ka wada sheekeysteen arrimo kale duwan oo la xiriira Horumarada Galmudug iyo Hirshabeelle.
Madaxweynaha Maamulka Galmudug ayaa dhankiisa waxaa uu wadaa kulamadii ugu dambeeyay oo ku saabsan la tashiyo sidii uu ku qabsoomi lahaa Shirka gaarka ah oo ay yeelanayaan Madaxda Dowlad Goboleedyada.
Ammaanka Magaalada Dhuusamareeb ayaa aad loo adkeeyay,waxaana amniga sugaya Ciidamo ka tirsan kuwa qeybta 21aad kuwa Nabadsugida & Booliska Soomaaliya,waxaana saacadaha soo socda halkaasi tegaya Madaxweynayaasha Maamulada, Puntland, Jubbaland iyo Koonfur Galbeed, iyaga oo mid kasta uu wato ilaalo u gaar ah.
