Wabiga Shabeelle ee dhexmara Magaalada Beledweyne ee Xarunta Gobolka Hiiraan ayaa markale waxaa uu bilaabay in uu ka fataho qeybo ka mid ah Xaafadaha Magaalada oo ay dad rayid ah ay degan yihiin.
Wabiga ayaa waxaa uu fatahaad ka sameeyay Xaafadaha ku dhow dhow hareeraha wabiga iyo goobaha uu ka jabasado,,sida xaafada laanta Bacadaha iyo Kiliga Waraaboole, waxaana dadka degan ay bilaabeen inay ka barakacaan si uusan khasaaro nafeed iyo mid hantiyadeed ugu geysan.
Guddoomiye ku xigeenka Siyaasada iyo Maaliyada Gobolka Hiiraan Abuukar Cabdullaahi Maadey oo ay wehliyaan Guddoomiyaha Degmada Beledweyne iyo Taliyaha qeybta Booliska Gobolka Hiiraan ayaa kor meeray goobaha iyo Xaafada uu ku fatahay Wabiga.
Guddoomiyaha degmada Beledweyne ee Gobolka Hiiraan ayaa sheegay in fatahaadaan ay saameeysay in ka badan 500 oo Guri,isla markaana dadka Shacabka ah ay ka barakaceen,waxaana uu sheegay in Maamulka degmada uu qaadi doono tallaabo looga hortagayo fatahaada.
Waxaa uu sheegay in fatahaada Wabiga ee xilligaan ay sabab u tahay Wabiga oo dhanka Itoobiya uga yimaado Gobolka Hiiraan uu roob farabadan ka da’ay,waxaana uu ku baaqay in dadka Wabiga ka fatahay gurmad lala soo gaaro.
In ka yar laba bilood ayaa kasoo wareegtay fatahaadii weyneyd ee Wabiga Shabeelle uu ka geystay Xaafado ka tirsan Magaalada Beledweyne,hayeeshee iyada oo dadkii ka baraacay ay weli kasoo kabsan uu markale uu bilaabay Wabiga in uu fatahaad sameeyo,waxaana Bulshada ay dalbadeen in loo soo gurmado.
