Ciidanka Midowga Afrika ee ATMIS ee ku sugnaa saldhigii ay ku lahaayeen degmada Raaga-ceelle ee Gobolka Shabeellaha Dhexe ayaa faarujiyay saldhigaasi, iyaga oo ku wareejiyay ciidanka dowladda Federaalka Soomaaliya ee jooga Raaga-ceelle.Munaasabad ka dhacday gudaha saldhiga ayaa saraakiil ka tirsan ciidanka ATMIS gaar ahaan kuwa ka socda Burundi ku wareejiyeen ciidanka xoogga saldhiga, waxaana Munaasabadda goobjoog ka ahaa saraakiil ciidan iyo maamulka degmada Raaga-ceelle.War Qoraal ah oo ay soo saareen ATMIS ayay ku sheegeen in Xil wareejintan ay qeyb ka tahay dib u habeynta ciidamada oo ay sameynayaan howlgalka ATMIS iyo DFS, si ay u xoojiyaan howlgallada ka dhanka ah Al-Shabaab ee ka socda Hirshabeelle.Ciidamada Burundi ee qaybta ka ah ATMIS ee baneeyay saldhiga Raaga-ceelle ayaa hadda loo wareejin doonaa deegaano kale, si kor loogu qaado amniga, iyadoo la eegayo hakad galinta bixitaanka ciidamada ATMIS mudada 3 bilood ah oo ay DFS codsatay.Dhawaan dowladda federaalka Soomaaliya ayaa codsatay in muddo la hakiyo heshiiskii bixitaan ka ciidanka ATMIS oo meelaha qaar ka baxay bilihii lasoo dhaafay, taas ayaa keentay in ciidamada qaar loo raro saldhigyo kale, waxaana lagu bilaabay kuwii joogay Raaga-ceelle.
