Dowladda Federaalka Soomaaliya ayaa muujisay inay doonayso inay sii xoojiso iskaashiga ay la leedahay Bangiga Adduunka, iyadoo dadaal ugu jirta helitaanka taageero caalami ah oo lagu horumarinayo dhaqaalaha iyo adeegyada bulshada.
Kulan ka dhacay Muqdisho ayaa waxaa yeeshay Wasiiru Dowlaha Arrimaha Dibadda, Cali Maxamed Cumar (Cali Balcad), Xoghayaha Joogtada ah ee Wasaaradda Arrimaha Dibadda, Xamza Aadan Xaadow, iyo Agaasimaha Bangiga Adduunka ee Soomaaliya, Hideki Matsunaga, iyo wafdi uu hoggaaminayay.
Kulanka ayaa diiradda lagu saaray sidii loo xoojin lahaa wada shaqeynta dowladda Soomaaliya iyo Bangiga Adduunka, iyadoo la waafajinayo mudnaanta horumarineed ee dalka.
Waxa kale oo laga hadlay sidii loo horumarin lahaa isdhexgalka dhaqaale ee gobolka iyo diblomaasiyadda dhaqaalaha, kuwaas oo dowladda u aragto inay muhiim u yihiin soo jiidashada maalgashiga iyo kobcinta ganacsiga.
Labada dhinac ayaa adkeeyay sida ay uga go’an tahay inay sii ballaariyaan iskaashiga jira, si loo taageero mashaariicda horumarinta, loo kobciyo dhaqaalaha, loona hagaajiyo fursadaha nololeed ee shacabka Soomaaliyeed.
Kulankan ayaa imanaya xilli ay Soomaaliya dadaal ugu jirto inay xoojiso xiriirka ay la leedahay hay’adaha maaliyadeed ee caalamiga ah, si ay u hesho maalgelin lagu taageero dib u dhiska dhaqaalaha, horumarinta adeegyada aasaasiga ah iyo hirgelinta qorshayaasha horumarineed ee dowladda.
