Hay’adda Wardi ayaa maanta raashin gargaar ah ku qaybisay degmada Buur-hakaba ee Gobolka Baay, iyadoo deeqdan loogu talagalay in lagu taageero qoysaska nugul ee ku nool degmada iyo deegaannada hoos yimaada.
Gargaarka ayaa la gaarsiiyay ku dhowaad 350 qoys, kuwaas oo qaar badan oo kamid ah ay ka yimaadeen tuulooyin hoos yimaada degmada Buur-hakaba.
Mas’uuliyiinta Hay’adda Wardi ayaa sheegay in ujeeddada gargaarku tahay in wax laga qabto baahiyaha nololeed ee qoysaska danyarta ah, gaar ahaan xilligan ay bulshada deegaanka wajahayaan duruufo dhaqaale iyo kuwo bani’aadannimo.
Qoysaskii ka faa’iideystay deeqda ayaa soo dhaweeyay tallaabada Hay’adda Wardi, iyagoo xusay in raashinka ay heleen uu wax weyn ka tari doono noloshooda iyo baahiyaha qoysaskooda.
Hay’adda Wardi ayaa sidoo kale muujisay muhiimadda ay leedahay in la sii xoojiyo taageerada loo fidinayo dadka nugul ee ku nool Gobolka Baay, si loo yareeyo saameynta dhibaatooyinka bani’aadannimo ee ka jira deegaanka.
Gargaarkan ayaa kusoo beegmaya xilli qaybo kamid ah bulshada ku nool deegaannada Koonfur Galbeed ay weli u baahan yihiin kaalmooyin bani’aadannimo iyo taageero nololeed oo joogto ah.
