Wasaaradda Waxbarashada, Hiddaha iyo Tacliinta Sare ee Dowladda Federaalka Soomaaliya oo kaashaneysa Wasaarada waxbarashada maamul goboleedyada iyo agaasinka waxbarashada gobolka banaadir ayaa soo bandhigay jadwalka waxbarashada ee sanad-dugsiyeedka 2026/2027, kaas oo hagaya habsami-u-socodka waxbarashada iyo hawlaha dugsiyada.
Jadwalkan ayaa muhiim u ah ardayda, waalidiinta, macallimiinta iyo maamulayaasha dugsiyada, maadaama uu qeexayo xilliyada waxbarashada, fasaxyada iyo marxaladaha kala duwan ee sanad-dugsiyeedka.
Dowladda Koonfur Galbeed ayaa muddooyinkii dambe xoogga saartay horumarinta nidaamka waxbarashada, iyadoo Wasaaradda Waxbarashadu ay qaadday imtixaannada shahaadiga ah ee fasalka 8-aad, isla markaana dhowaan shaacisay natiijooyinka sanad-dugsiyeedka 2025/2026.
Sidoo kale, jadwalka cusub wuxuu imanayaa xilli ay socdaan dadaallo lagu xoojinayo tayada waxbarashada iyo isku-duwidda nidaamka waxbarashada ee dalka.
Wasaaradaha ayaa ugu baaqaya bahda waxbarashada in ay si dhow ugu hoggaansamaan jadwalka la soo saaray, si sanad-dugsiyeedka cusub uu ugu bilaabmo si nidaamsan, loona xaqiijiyo in ardaydu helaan waxbarasho joogto ah oo tayo leh.
